Бүген укучылар коллективы яраткан укытучыларын һөнәри бәйрәмнәре белән тәбрикләделәр. Тантаналы линейкада укытучыларга багышланган матур җырлар, шигырь юллары яңгырады.

Теләкләрнең кайсын теләсәк тә

Аз булыр күк сезнең хөрмәткә

Аяз булсын мәңге күңел күгегез

Без калабыз шушы теләктә!

Бүген укытучыларның һөнәри бәйрәмнәре район күләмендә зурлап билгеләп үтелде. Мәктәбебез укытучылары тантаналы бәйрәм чарасында катнашып рухи азык алып кайттылар. Шундый матур, эчтәлекле бәйрәм кичәсе оештырган өчен җитәкчеләребезгә зур рәхмәт! Бәйрәмегез белән, кадерле укытучылар!

Өлкәннәр ункөнлеге башлану уңаеннан Татар Суксу авыл җирлегендә ярминкә булды. Мәктәп коллективы ярминкәгә мәктәп бакчасыннан җыелган уңыш һәм укытучылар сатуга тәкъдим иткән авыл хуҗалыгы продукциясе белән катнашты. Өлкәннәребез түбән бәягә генә тәкъдим ителгән кәбестә, суган, сарымсак, балны бик теләп алдылар.

5нче сыйныф укучылары үзләренә беркетелгән Баян Дәүләтов урамында яшәүче өлкән кешеләргә ярдәмгә бардылар. Салиха әбигә, Илгиз абыйга, Халидә апага, Флорида апаларга бакча эшләрендә булыштылар, чүп ташыдылар. Өлкәннәр аларга рәхмәтләр укып, тәмле алмалар белән сыйладылар." Кешегә яхшылык эшләү нык рәхәт икән! - ди, бишенчеләр.

28 сентябрьдә район күләмендә үткәрелгән "Сәламәтлек көне"ндә мәктәбебез укучылары һәм укытучылары бик теләп катнаштылар. 

Башлангыч сыйныф укучылары Тат.Суксу янгыннан саклану бүлекчәсенә экскурсиягә бардылар.  Анда аларны бүлек җитәкчесе Латыйпов Айзат, ут сүндерүче Шәйхәйдаров Марсель абыйлары каршы алды. Алар укучылар белән кызыклы әңгәмә үткәрделәр, киңәшләр бирделәр. Ә Марсель абыйларының берничә секунд эчендә ут сүндерүче киемен киеп өлгерүе балаларны таң калдырды. Экскурсия бик кызыклы һәм файдалы булды. 

Бүген барлык классларда да сәламәт яшәү рәвешен пропогандалау максатыннан сәламәтлек сәгатьләре булып узды. Укучылар презентацияләр, видеороликлар карадылар. Югары классларда "Юк" дип әйтә белик!" - исеме астында әңгәмәләр булып узды. Соңыннан яңа ачылган спорт мәйданчыгында волейбол уены үтте.

Бүген безнең Татар Суыксуы авылында сөенечле вакыйга - өр-яңа спорт мәйданчыгы ачылу тантанасы булды. Махсус җиһазландырылган волейбол, баскетбол мәйданчыгы булу безнең мәктәп өчен зур шатлык. Бәйрәмгә Тат. Суксу һәм Мари Суксу урта мәктәбе укучылары, укытучылары, авыл халкы килгән иде. Район башкарма комитеты җитәкчесе И.Э.Фәттахов безнең шатлыгыбызны уртаклашты, мәктәпкә волейбол, баскетбол туплары бүләк итте. Соңыннан Мари Суксу һәм Тат. Суксу урта мәктәбе командалары арасында волейбол ярышы булды. Җитәкчеләргә зур рәхмәт!

Бүген мәктәп күләмендә "Экстримизмга - юк!" темасы астында класс сәгатьләре булып узды. Укучыларга терроризм турында презентацияләр, видеороликлар күрсәтелде. 2004 елда Беслан мәктәбендә булган фаҗига турында әңгәмәләр уздырылды. Башлангыч сыйныф укучылары белән район участок инспекторлары җитәкчесе урынбасары очрашу үткәрде.

Чакыра, тагын чакыра

Кыңгырау классларга.

Бүгеннән - Белем көненнән

Уку елын башларга!

Быелгы уку  елын мәктәбебез коллективы өр-яңа матур мәктәптә башлап җибәрә. Белем көне белән тәбрикләргә бик  күп кунаклар, әти-әниләр, авылдашлар килгән иде. "Хәерле сәгатьтә!" дип Яңа 2014-15нче уку елын башлап җибәрдек!