Бүген балалар белән табигатькә чыктык. Чирмешән буйларын, Сәет күлен карап,  авылыбыз тирәсендәге болыннарда рәхәтләнеп уйнап, самолетлар очырып кайттык.

Бүген безнең лагерьда "Баллы көн" булды,чөнки 7 нче июнь- шоколадлы туңдырма көне буларак билгеләнеп үтелә. Балалар туңдырма турында шигырьләр яздылар, рәсемнәр ясадылар, туңдырма ничек ясалувы турында видео карадылар һәм шоколадлы туңдырма белән сыйландылар. Соңыннан саф һавада хәрәкәтчән уеннар уйнадылар.

6 июнь - бөек рус шагыйре  Александр Сергеевич Пушкинның туган көне. Мәктәп лагеренда бу көнне балалар арасында ярыш уздырылды. Алар шагыйрь һәм аның иҗаты буенча үзләренең белемнәрен сынадылар. Ребуслар чиштеләр, рәсемнәр буядылар һәм үзләре дә шигырь язып карадылар

Әлеге экологик бәйрәм 1972 елдан билгеләп үтелә. Бүген экологик проблемалар бик күп, ләкин һәркем, аз-азлап булса да, планетабызны саклау өчен үз өлешен кертә ала. Ничек итепме? Гап-гади кагыйдәләрне үтәп. Тәрбиячеләр лагерьга йөрүче балалар белән шушы кагыйдәләрне искә төшерделәр. Һәркем үти алырлык гади һәм җиңел кагыйдәләр. Гади генә булсалар да, алар безнең тирә - юнебезне саклауга зур өлеш кертергә сәләтле. Балалар арасында шушы кагыйдәләргә нигезләнеп ясалган рәсемнәр конкурсы да үтте.

4 нче июнь  "Бөтендөнья кариеска каршы көрәш көне" буларак билгеләп үтелә. Бу көнне кариес һәм аны профилактикалау ысуллары турында хәбәрдарлыкны арттыруга юнәлтелгән төрле чаралар үткәрелә.
Әлбәттә, "Дуслык" лагеры да читтә калмады. Балалар белән кариес турында, аның килеп чыгу сәбәпләре һәм аны булдырмау өчен нәрсәләр эшләргә кирәклеге турында сөйләштек. Шулай ук дөрес теш чистартуны да искәртеп үттек. Әңгәмәдән балалар кариеска багышланган кызыклы квест үттеләр.

Бүген мәктәп алдындагы "Дуслык" лагеры үзенең эшен башлап җибәрде.

Күркәм традиция буенча, 25нче майда барлык мәктәпләрдә дә Соңгы кыңгырауның моңлы тавышы чыңлады.  Бу көнне безнең мәктәбебездә дә 9 нчы һәм 11 нче сыйныф укучылары өчен соңгы кыңгырау яңгырады.

Соңгы кыңгырау бәйрәме олы тормышка юлланучы кичәге укучыларны алдагы көннәрнең гаҗәеп матур, тынгысыз, соклангыч һәм шул ук вакытта сынаулар белән тулы, җаваплы булачагын искәртеп тора кебек. Соңгы тапкыр яңгыраган кыңгырау чыңы  укытучылары, сыйныфташлары, туган мәктәбе белән хушлашу авазыдай булып тора.

Укучыларда гаилә кыйммәте төшенчәсен формалаштыру,аларга әти-әни, әби-бабай хакын хаклау кирәклеген аңлату, балачактан үзеңне бәхетле гаилә төзергә әзерләргә кирәклеген төшендерү максатыннан, мәктәптә “Минем гаиләм” темасына сыйныф сәгатьләре уздырылды.

Гаилә гомер-гомергә яшәешнең башлангычы булды. Ул – кешенең төп терәге, җәмгыятьнең рухи сәламәтлеге чыганагы. Гаилә – ул җылылык, мәхәббәт, ышаныч учагы. Аның төп бурычы – балалар үстерү, аларга лаеклы белем бирү, тормышта үз юлларын табарга өйрәтү. Нәкъ менә гаиләдә бала шәфкатьлелек, намуслылык, хезмәт һәм патриотик тәрбиянең беренче сабакларын ала. Сезгә бу күркәм бәйрәмдә чын йөрәктән иминлек, матур, тату, тигез тормыш, бәхетле көннәр телибез. Гаилә учагы тормыш зилзиләләреннән саклап, үзенә тартып торсын, ата-аналар белән балалар арасындагы мөнәсәбәтләр җылы, ихтирамлы булсын!

Бүген мәктәбебездә Алсу Нәҗминең иҗат кичәсе үткәрелде. Бәйрәмгә бик күп кунаклар җыелды: язучылар, җырчылар, укытучылар, мәдәният хезмәткәрләре. Кичә "Туган телем- хәзинә" дип аталган исем астында үтте. Килгән кунаклар да, хуҗалар да туган телнең әһәмиятен күп тапкырлар искә төшерделәр. Укучылар Алсу Нәҗминең әсәрләренә иллюстрацияләр ясадылар."Карга һәм карлыгач" шигырен сәхнәләштерделәр. Шагыйрәнең шушы сәхнәләштерелгән шигырендә дә  һәр кеше үз телен яратырга, хөрмәт итәргә, сакларга тиешлеге ассызыклана. Укучы кызларыбыз Алсу Нәҗминең буыннан буынга тапшырылып килгән мөнәҗәтен әйттеләр.