Бүген 9 класс укучылары Норлатта математикадан имтихан тапшырдылар. Башка еллардан аермалы буларак быел алар да видеокамералар карашы астында язарга мәҗбүр булдылар.

   Бүген мәктәп укучылары табигатькә экскурсиягә чыкты. Тантаналы линейкада 4 класс укучыларын "Гөрләвекләр"гә, 8 класс укучыларын "Ташкыннар" берлегенә кабул иттеләр. Шуннан соң 4 командага бүленеп укучылар кызыклы ярышта көч сынаштылар. Җиңүче булып 8 класс командасы танылды. Котлыйбыз!

Шимбә көнне районыбыз мәктәпләрендә "Соңгы кыңгырау" кичәләре узды. Ачасыр урта мәктәбен дә быел 8 укучы тәмамлый, шуларның икесе 9 сыйныф укучысы. Тантаналы кичә бик тә күтәренке рухта, матур узды. Чыгарылыш сыйныф укучылары чыгышлар ясадылар, укытучыларына чәчәк бәйләмнәре бүләк иттеләр. Килгән кунаклар исә, укучыларга хәерле юл, имтиханнарда уңышлар теләделәр. Ә уку елын гел "5" легә генә тәмамлаучы 7 укучыга Әнвәр Миңнуллинның махсус стипендиясен  мәктәп директоры Марс Маликов тапшырды. Кичәдән соң чыгарылышлар һавага шар бәйләмнәре очырды.

   Бүген 11 сыйныф укучыларның беренче имтиханнары башланды. Безнең бер укучыбыз рус әдәбиятыннан ЕГЭ форматында имтихан тапшырып кайтты. Уңышлар, сезгә, 11 ләр!

   Бүген 9 класс укучылары Норлат мәктәбе базасында татар теленнән имтихан тапшырдылар. Быел 9 класс укучылары да беренче тапкыр тестлаштыруны видеокамералар һәм Рособрнадзор вәкилләре карашы астында тапшырды. Шунлыктан укучыларның шактыенда каушау һәм борчылу кебек психологик күренешләр күзәтелде. Нәтиҗәләр 10 көннән билгеле булыр дип көтелә.

Гомуми мәктәп линекасы чираттагы бәйге җиңүчеләрен тәбрикләү белән башланып китте. 7 класс укучысы Бикмуллина Гөлия Яшел Үзәндә узган шигырь укучылар бәйгесеннән 1 урын яулап кайтты. 4-5 класс укучылары "Безопасное колесо" бәйгесендә уңышлы чыгыш ясап кайттылар. Аларга да Рәхмәт хатлары һәм бүләкләр тапшырылды. Котлыйбыз!

  Мәктәп укучылары Бөек Җиңүнең 70 еллыгына багышланган тантаналы митингта катнашты. Ул авылның Бөек Ватан сугышында катнашучылар истәлегенә салынган һәйкәл янында узды.

  Мәктәпнең 6,7,9 класс укучылары Кече Шырдан авылында Бөек Ватан сугышында катнашучылар хөрмәтенә салынган һәйкәл ачу тантанасында катнашты. Укучыларыбыз Бөек Җиңүнең 70 еллыгына багышланган күп төрле чараларда катнаша. Монысы да укучыларыбызның чираттагы "Шәфкатьлелек акциясе".  Һәйкәл янында чыгыштан кала, укучылар авыл клубы сәхнәсендә концерт программасы да тәкъдим иттеләр. Килгән кунаклар һәм авыл халкы укучыларыбызны җылы кабул иттеләр.

Бүген мәктәбебездә Мәгариф һәм Фән министрының махсус боерыгы нигезендә "Бердәм туган тел дәресе" үткәрелде. Чарага барлык класс укучылары да катнашты. Гатиятуллин М.Г. укучыларны Тукай премиясе лауреатлары белән таныштырса, дәрескә кунак итеп чакырылган китапханә мөдире Касыймова Зөлфирә апа укучыларны яңа чыккан һәм авылыбызда иң күп яратылып укыла торган китапларга күзәтү ясады. Дәрес бик күңелле һәм файдалы булды. Укучылар тын да алмый тыңладылар.

 Бүген, татар теле һәм әдәбияты атналыгы кысаларында, Гатиятуллин М.Г. тарафыннан "Башваткыч" уены үткәрелде. Уенга 5-11 класс  укучылары катнаштылар. Уенда 8 класс укучылары үзләрен бик зирәк һәм тапкыр булуларын күрсәттеләр һәм 1 урын алдылар. 5 класс укучылары да алардан калышмады. Класс җитәкчеләре Гафиятуллина Ә.А ярдәме белән соңыннан бирелгән мәкалне дә әйтеп бирә алдылар. Калган класслар да сорауларны тиз таптылар тик аларга  бераз гына җитезлек җитеп бетмәде. Барыгызга да әфарин дуслар!!!