Көзге каникул көннәренең берсендә, дөресрәге, 5 ноябрь көнне бакчада "Юл йөрү билгеләре көне" узды. Иртәнге якта балалар темага кагылышлы уеннар уйнады, раскраскалар буяды, юл билгеләрен ясады, әти-әниләр белән берлектә күргәзмә әзерләде.

Ә кичке якта әти-әниләр катнашында "Юлда йөри беләсеңме?" дигән КВН булды. Уен алдыннан "Юл йөрү кагыйдәләрен өйрән!" исемле фильм күрсәтелде һәм кичәгә чакырылган участок полиция инспекторы Галимов И.М. райондагы, республикадагы балалар катнашында  килеп чыккан юл транспорт фаҗигалары турында мәгълүмат бирде. Ул шулай ук әти-әниләргә машинада йөргәндә иминлек креслоларын һәм караңгы вакытта киемнәрдә яктырткыч эмблемалар куллану кирәклеген аңлатты. 

Юлларда һәм җәйге чорда велосипедта йөргәндә балалар белән бәла-казалар килеп чыкмасын өчен бакчада гына түгел, ә өйдә дә даими балаларга аңлатырга һәм үзегез үрнәк күрсәтергә тиеш дип ассызыклады инспектор. 

КВН барышында балалар һәм әти-әниләр үзләренең юл билгеләрен яхшы белүләрен күрсәтте, табышмакларга җавап тапты, бергә "Светофор" уены уйнады.

Кичә ахырында әти-әниләргә буклетлар һәм медальләр тапшырылды, ә балалар яктырткыч беләзекләр белән бүләкләнде.