7 май көнне зурлар төркеме балалары сугыш ветераны Йосыпов Мәгъдәнур бабай янына бардылар. Җәй көне 90 еллыгын тутыручы ветеран шат күңел белән балаларны каршы алды. Мәгъдәнүр бабай  1943 елны 17 яшендә сугышка киткән. Монголиядә хезмәт иткән, Пруссия җирендә, Балтыйк диңгезе буенда сугышкан, яраланган, тагын сугышка киткән. Сугыш беткән көнне "Аллага шөкер, исән-сау калдык!"  дип сөенгәннәрен искә ала. Ләкин туган авылыбызга 1946 елның декабрендә генә кайта алган. Ә кайтканның икенче көнендә үк колхозга эшкә чыга һәм 45 елдан артык тимерчелектә тырышып хезмәт куя. Балалар ветеранга үзләрен кызыксындырган сорауларны яудырды, медальләрен ни өчен бирелгәнен тикшерде. Балалар белән фотога төшкәннән соң, Мәгъдәнүр бабай кечкенәләргә үзенең теләкләрен җиткерде: "Әти-әниләрегезнең, ризыкның кадерен белегез! Сезгә сугыш кайгыларын, ачлык, ятимлекне күрергә язмасын! - диде ветеран.