Туган илебез шатланып, моңаеп һәм зур дулкынлану белән 9 Май – Җиңү бәйрәмен көткәндә, Кече Урыссуы балалар бакчасы тәрбияләнүчеләре тыл ветераны, хөрмәтле укытучы Нәсимә апа Фәйзуллина белән очрашуга бардылар.

   Быел үзенең 90 яшьлек юбилеен уздырган Нәсимә әби балаларны сөенеп каршы алды. Тәрбияче Зилә Әмирҗан кызы ветеранны Җиңү бәйрәме белән тәбрик итеп, үзе үстергән лалә чәчәкләрен бүләк итте, аңа ныклы сәламәтлек һәм балалары, онык-оныкчыкларының кадерлесе булып озын-озак яшәвен теләде.

   Нәсимә әбинең сугыш вакытындагы истәлекләрен балалар кызыксынып тыңлады, әбигә сораулар яудырдылар. Гомер буе балаларга белем биргән укытучы ветеран һәр сорауга ашыкмыйча гына җавап бирде. “Без күргән авырлыкларны, ачлыкны, сугышны моннан соң беркемгә дә күрергә язмасын. Җиребездә һәрчак тынычлык булсын иде”, - дип теләкләрен теләде Нәсимә әби.

   Очрашу сый белән тулы чәй табыны янында дәвам итте. Нәсимә әби үзенең чәен дә эчәргә онытып, һәр баланы үзенең тәмлүшкәләре белән сыйлады.

   9 Май – Җиңү бәйрәменә багышланган митингта очрашуга өмет итеп ветеран – укытучы Нәсимә әби белән саубуллаштык.

  Форсаттан файдаланып, районыбызның барлык сугыш һәм тыл ветераннарына балалар исеменнән матур тормышыбыз өчен рәхмәт әйтәсебез килә. Бәйрәм белән сезне ветераннар!