16 май көнне безнең мәктәп укытучыларына да ноутбук тапшырылды. Алар эш процессында нәтиҗәле кулланылыр дип ышанып калабыз.

12 май көнне Казан шәһәренең 149 нчы татар-төрек лицеенда Татарстан һәм татар халкы тарихы буенча V республика конкурсының II туры булып узды. Анда I турда уңышлы чыгыш ясаган Тимершык урта мәктәбенең 7 нче сыйныф укучысы Фазылова Зәринә (укытучысы - Фазылова Г.Җ.), Завод-Нырты урта мәктәбенең 8 нче сыйныфы укучысы Сәфәргалиева Минзилә (укытучысы - Гобәйдуллина Ч.Х.), Шәмәрдән лицееның 10 нчы сыйныфы укучысы Гарифуллина Энҗе (укытучысы – Галиуллина Э.И.) катнашты. Алар конкурс таләпләре буенча фәнни эшләрен яклап чыгыш ясадылар, 9-11 нче сыйныфлар БДИ биремнәре тибындагы тест эшләделәр. Фазылова Зәринә “Ил елъязмасында минем гаиләм тарихы” номинациясендә I урынга лаек булды, Сәфәргалиева Минзилә кызыксындыру призы белән бүләкләнде. Барлык укучыларга да грамоталар, исәлекле бүләкләр тапшырылды.  Котлыйбыз!

Март аенда укучыларыбыз мәдәният йортына бию түгәрәгенә йөри башладылар. 9 май көнне бәйрәм концертында без аларның беренче чыгышларын карадык. Кече группа, уртанчы һәм өлкән группа - һәрберсе берәр бию өйрәнгән. Тамашачылар аларның чыгышларын көчле алкышлар белән бүләкләде. Җитәкчеләре Илназ Рәисович Фазылҗановка чын күңелдән рәхмәт белдерәбез. Молодцы, уңышлар сезгә!

Илебез быел 66 нчы тапкыр Бөек Җиңү бәйрәмен билгеләп үтте. Безнең мәктәп укучылары да бәйрәм көнне Тимершык авылы уртасында урнашкан обелиск янына тантаналы чарага җыелдылар. Җылы язгы кояш, очрашуда катнашучы сугыш һәм тыл ветераннары ямь өстенә ямь өстәделәр, 8 нче сыйныф укучылары көче белән матур җырлар, шигырьләр башкарылды (сыйныф җитәкчесе - Хәбибуллина Э.Ә., сценарий авторы - Нургаязова Г.Х.). Бәйрәм мәдәният йортында дәвам итте.

5 май көнне педагогик коллектив Тинчурин театрында "Төн яна учакта" спектакленең премьерасында булып кайтты. Ремонттан соң яңартылган театр бинасы, премьера укытучыларда уңай тәэсирлэр, матур истәлекләр калдырды.

5 май көнне татар теле һәм әдәбияты укытучысы Нуруллина З.Ф. җитәкчелегендә 6 нчы сыйныф укучысы Фазылова Таңсылу Казан шәһәрендә "Илһамлы каләм" конкурсының йомгаклау тантанасында катнашты. Ул конкурсның дипломына һәм бүләккә лаек булды. Котлыйбыз!

Бүген "Оста куллар" (җитәкчесе - Фальванова А.Ф.) һәм "Интерьер" (җитәкчесе - габтрахимов М.Н.) түгәрәгенең иң яхшы эшләре "Иҗат - бәхет чишмәсе" фестивале күргәзмәсендә катнашты һәм 1-2 урыннарга лаек булды. Котлыйбыз!

27 апрель көнне безнең мәктәптә Баскет-шоу буенча зона ярышлары булып үтте. Киеренке барган бәйгедә безнең мәктәп укучылары беренчелекне алды һәм район ярышында катнашу хокукына ия булды. Аларга уңышлар телибез. Молодцы!

27 апрель көнне тарих һәм җәмгыять белеме укытучысы Хаҗиев А.Х. 10-11 нче сыйныф укучылары белән Россия Парламентына 105 ел тулу датасына багышланган ачык дәрес үткәрде. Дәрестә укучылар Парламент тарихы, аның үткәне һәм бүгенгесе белән таныштылар, үзләрен кызыксындырган сорауларга җаваплар алдылар.