Сугыш  мәңге тынса икән!

    Шәмәрдән лицее җәйге лагеренда ял итүче балаларның һәр иртәсе зарядкадан башлана. 22 июнь – Бөек Ватан сугышы башланган көн булганга, зарядкадан соң балалар марш атладылар, җырлап стройда йөрделәр. Хәрби әзерлек укытучысы һәм лагеребезның физругы Вәлиуллин Дилүс Миндел улы, лагерь начальнигы Емельянова Ләйсән Мәҗит кызы балалар белән сугыш темасына әңгәмә үткәрде.Шөгыльләрдән соң вожатыйлар Чулпан Бикбаева, Олеся Степанова,Диләрә Хәева, Асия Сафиуллина җитәкчелегендә һәр отряд “Без тынычлык яклы!”, “Мы за мир!” темасына асфальтка  рәсем, композицияләр ясадылар. Төшке аштан соң балалар Сабаның №2 мәктәбендә урнашкан хәрби- диңгез музеена экскурсиягә бардылар. Бу көнне һәр бала да тыныч яшәргә язсын, сугышларны безнең буынга күрергә язмасын дигән теләк белән өйләренә таралды. Еллар тыныч булсын, бу якты дөньяда кешеләр дус, тату, бердәм яшәсеннәр.Шул ук вакытта сугыш һәм тыл ветераннарының батырлыгы беркайчан онытылмасын иде...

          Без телибез ак күгәрченнәрнең

          Һаваларда биек очуын.

          Без телибез туган илебезнең

          Хыяллары чынга ашуын.

          Тынычлык, иминлек һәм дуслык ул

           Халыкларның изге теләге.

          Тынычлык, тынычлык, тынычлык дип,

            Миллионнарның тибә йөрәге.

    Галиуллина Энҗе