Октябрь ае бәйрәм көне- Өлкәннәр көне белән башлана. Шәмәрдән лицеенда бу көн матур чараларга бай булды. Башлангыч сыйныф укучылары  “Минем яраткан әбием- бабаем” темасы буенча  фотоконкурс һәм проект эшләрен  тәкъдим иттеләр.

  Район тарафыннан әзерләнгән 100 күчтәнәч пакетын әби- бабайларга тапшыру  эшендә дә укучылар һәм сыйныф җитәкчеләре актив  катнашты. Бу эшне оештыруда  лицей директоры Илшат Шамилов һәм мәктәп профсоюз оешмасы җитәкчесе Ләйсән Корбанова башлап йөрделәр.

  Мәктәп профсоюз оешмасы  лаеклы ялда булган укытучы һәм хезмәткәрләребез өчен бәйрәм оештырды. Өлкәннәребез ул көнне лицеебызның кадерле кунаклары булдылар.Укучылар һәм укытучылар көче белән әзерләнгән концерт-тамаша да өлкәннәребез күңеленә хуш килде.Бу көнне өлкәннәребез яшьлек елларына кайттылар, яшьлек  җырларын тыңладылар һәм кушылып җырладылар.Аларның кузләрендә шатлык яшьләре җемелдәде. Барысы бер теләкне теләде: еллар имин булсын,табыннар мул булсын һәм сезгә дә бу көннәрне күрергә язсын.