Мәдәният йорты белән берлектә бүген Нәүрүз бәйрәме үткәрелде. Бәйрәм  укучыларның сәхнәләштергән күренеше белән башланып китте. Тәмле ботка, коймаклар белән сыйланып, төрле уеннар, ярышларда катнашып, истәлек бүләкләре алып  укучылар һәм авыл халкы  рәхәтләнеп ял итте.

Бүген Балтачта үтүче "Шаги в науку" дип исемләнгән фәнни конференциядә уңышлы чыгыш ясап, 8нче сыйныф укучысы Сафиуллин Касыйм (җитәкчесе - информатика укытучысы  Галиева Г.М.) III дәрәҗә диплом белән бүләкләнде. Аларны чын күңелебездән котлап, алга таба да зур җиңүләр теләп калабыз.

Бүген мәктәбебез укучылары һәм укытучылары  мәдәният йорты белән берлектә үткәрелгән Сабада яшәп иҗат итүче авылдашыбыз журналист- язучы,”Бәллүр каләм”бүләге иясе,Татарстанның атказанган мәдәният хезмәткәре, Татарстан журналистлары берлеге әгъзасы –Гөлсинә Наил кызы Галимуллинаның "Алтын ачкыч" китабын тәкъдир итү кичәсендә булдылар. Китапның төп герое - Татарстан Республикасының баш казые, Балтач районы баш мөхтәсибе, бик күп дини китаплар авторы Җәлил хәзрәт Фазлыев та катнашты. Аның вәгазьләре һәркемнең күңеленә шәфкатьлелек орлыклары өстәде.

Бүген мәктәбебезнең 2б, 6нчы,7нче сыйныф укучылары Лесхозда "Нарат" боз сараенда булдылар. Алар рәхәтләнеп ял итеп, сәламәтлекләрен ныгытып кайттылар.

Мәктәп күләмендә табигый фәннәр атналыгында үткәрелгән "Кошларга оя" конкурсында укучылар  актив катнашып, барлыгы 35 оя ясап алып килделәр.

Бүген "Балаларның рухи сәламәтлеге" темасы буенча ата-аналар җыелышы үткәрелде. Көн тәртибе буенча мәктәп директоры А.Н.Шаймарданов чыгышыннан соң, Эзмә ФАП фельдшеры Шәйхетдинова Г.Ш. һәм 7нче сыйныф җитәкчесе Хадиева Г.Ә. чыгышлары тыңланды. Соңыннан җыелыш сыйныфларда дәвам итте.

Мәктәбебезнең каләм тибрәтүче укучылары профессор, филология фәннәре докторы, татар журналистикасы мөдире - Васил Заһид улы Гарифуллин исемендәге "Серле каләм" бәйгесенең йомгаклау этабында катнаштылар. "Иҗади эшләр" номинациясендә 7нче сыйныф укучысы Гарифуллин Айнур I дәрәҗәдәге диплом, "Наркотикларга каршы  көрәш" номинациясендә 10нчы сыйныф укучысы Әхмәдиева Зәлия III дәрәҗәдәге дипломга ия булдылар. 8нче сыйныф укучысы Сафиуллин Касыйм һәм 11нче сыйныф укучысы Нәгыймов Илдус актив катнашкан өчен рәхмәт хатлары белән бүләкләнделәр.

 8 Март бәйрәме уңаеннан мәктәптә "Ягез, әле, кызлар!" бәйгесе үткәрелде. 5-7 сыйныф кызлары Зәринә Әмирҗанова, Азалия Хафизова, Ләйсән Әхмәтшина 6 турда көч сынашып "Иң уңган кыз", Иң җитез кыз", "Иң сөйкемле кыз" иссеменә лаек булдылар. Бәйрәм укучы малайларның концерт номерлары белән үрелеп барылды.

Күчкәнме бу залга дөньяның бар яме,

Күңелләр түрендә Әлифба бәйрәме.

Бу матур бәйрәмгә кушыл, дус, әйдә,

Дөньяны гөрләтсен Әлифба бәйрәме.

Бүген 1нче сыйныф укучыларының Әлифба бәйрәме үтте. Сыйныф җитәкчеләре Зөлфия Тәхәветдиновна, әти-әниләре укучыларны беренче зур җиңүләре белән тәбрикләде.

Мәктәбебездә балалар һәм яшүсмерләр китабы атналыгын уздыру буенча чаралар планы төзелде, укучыларыбызга әлеге атналык буенча район һәм мәктәп күләмендә үткәреләчәк мероприятиеләрдә катнашу өчен күрсәтмәләр бирелде, әсәрләр исемлеге тәкъдим ителде.