Үстеләр чәчәкләр,

Их, матур үзләре:

Резеда, георгин

Күгәрчен күзләре...

  Бакчабыз биләмәсен матурлау, ямьләндерү, бизәү буенча күп кенә эш алып барыла.Яз җитү белән хезмәткәрләребез һәм әти-әниләр тырышлыгында күп төрле,берсеннән-берсе матур гөлләр утыртылды. Җәйнең җылы, яңгырлы булуы чәчәкләргә хуш килде, тирә-юнь аллы-гөлле төсләргә күмелде. Табигать биргән матурлыкны күрә, тоя белергә өйрәтү,чәчәкләрне таный һәм аера белергә күнектерү максатыннан балалар белән даими күзәтүләр оештырыла. Чәчәкләрнең төсләренә, таҗ, яфракларының формаларына, төзелешенә игътибар ителә; аларны чагыштырып карау ысулы аша охшашлыкларын, аермалыкларын күрә белергә; таный һәм аера белү өстендә эш алып барыла. Өлкәннәр хезмәтенә хөрмәт, чәчәкләргә карата сакчыл караш тәрбияләнә. Зурлар төркеме балалары тәрбияче Ахметсафина Ләйсән Хазиевна белән берлектә "Чәчәкләргә күмелгән - гөлбакча" темасына әңгәмә вакытында сокландыргыч гүзәл чәчәкләрнең кешеләргә, аларның сәламәтлекләренә уңай йогыты ясавын аңлатты. Шушы матурлыкны саклый белергә кирәклеген төшендерде.

Иртә әле, вакыт бар дип,

Озак йоклап ятма син.

Кояштан алда уян да,

Флешмобта катнаш син.

"Шатлык" балалар бакчасында балалар һәм тәрбиячеләр катнашында флешмоб узды. Аның максаты музыка һәм бию хәрәкәтләре аша сәламәтлеккә тарту иде. Флешмобта катнашучылар төрле жанрдагы көйләргә рәхәтләнеп биедәләр, уңай эмоция алдылар.

Бакча бүген гөрләп тора,

Шаулап тора, күрегез.  

Без бит бәйрәмгә җыелдык

Әллә шуны белмисез.

Бүген гади көн түгел бит

Моны беләбез без.

Елмаеп исәнләшәбез

Әти-әниләр белән.

Һәр җирдә бер хикмәт көтә

Бүген гади көн түгел.

Бүген- Гаилә бәйрәме

Шуңа шатлана күңел.

Нигә бүген бакчада

Бик күңелле, бик ямьле?

Чөнки бүген кунакка

Дәү әниебез килде.

Сердәшчем дә, киңәшчем дә,

Якын дустым да китап.

Дөньядагы бар нәрсәне

Сыйдырган нурлы китап.

 Әйе, китап-тормышыбызда иң кирәкле әйбер.Ул киңәшче дә, дус та, сердәш тә. Яхшы китап гел күңел түрендә саклана. Аны гел укыйсы килеп тора. Бүген нәниләр төркеме балалары халыклар белән халыкларны тоташтыручы, чорлар арасында күпер салучы китап турында сөйләштеләр. Алар кечкенә китапчыклар карадылар. Китапчыклардагы төрле-төрле матур рәсемнәр балаларның сөйләм телен ачарга һәм сүзлек байлыгын арттырырга ярдәм итә.

Хөрмәтле хезмәткәрләр,әти-әниләр, балалар, барыгызны да мөселманнарның төп бәйрәмнәренең берсе -Ураза бәйрәме белән тәбриклибез!Шушы изге айдагы яхшылык һәм шәфкатьлелек көндәлек тормышта һәрчак янәшә булыр, дип ышанабыз. Ураза бәйрәме һәр йортка, һәр гаиләгә җылылык һәм шатлык, татулык һәм муллык, тынычлык һәм иминлек алып килсен! Изге теләкләр белән «Шатлык» балалар бакчасы администрациясе!

Беренче кечкенәләр төркеме балалары белән эшчәнлекләр, уен вакытында юл йөрү кагыйдәләре, светофор белән даими таныштырылып барыла. Алар светофорның кызыл, сары, яшел күзләре булуын бик яхшы беләләр. Бу төсләрнең нәрсә аңлатканын да күп бала әйтеп бирә ала. Яшел ут янгач кына юл аркылы чыгарга яравын, кызыл һәм сары утларда көтеп торырга кирәклеген уен вакытында балалар яхшы үзләштерделәр..