Бүген уртанчылар төркемендә "Балаларның иҗади сәләтләрен үстерү" дигән темага ата-аналар җыелышы булып узды.Түгәрәк өстәл артында балаларның уйлап табу сәләтен һәм иҗади активлыгын үстерү турында әти-әниләр белән әңгәмә үткәрелде. Балаларның иҗади сәләтләрен нинди шартларда, нинди уеннар аша үстереп була, шулар турында сөйләштеләр. "Бармаклар белән рәсем ясыйбыз" мастер-класс үткәрелде. (Тәрбияче Гилемханова Әнисә Әминовна)

Гаиләдә әбиләр – бабайлар тәрбиясен көчәйтү, балаларны аларга карата мәрхәмәтле, ихтирамлы булырга өйрәтү. Татар халкының милли гореф-гадәтләре, йолалары белән таныштыруны дәвам итү максатыннан мәктәпкә әзерлек төркемендә "Әбекәй - алтыным, минем иң якыным!" исеме астында бәйрәм үткәрелде. Балалар дәү әниләренә, әбиләренә шигьри юллар аша котлауларын җиткерделәр. Бәйрәм җыр, бию, уеннар белән үрелеп барды.Бәйрәм ахырында балалар дәү әниләренә үз куллары белән ясаган чәчәкле кәрзин бүләк иттеләр.

Бу атнада бакчабызда бар эшчәнлек 1 октябрь - Өлкәннәр көне темасы астында үтте. Балаларда өлкәннәргә карата мәрхәмәтлелек, шәфкатьлелек, миһербанлылык хисләре тәрбияләнде. Өлкәннәргә һәрдаим ярдәм итәргә, булышырга кирәклеге аңлатылды. Уртанчылар, зурлар, мәктәпкә әзерлек төркеме балалары тәрбияче апалары белән берлектә кадерле дәү әниләрен, әбиләрен бәйрәм белән котлау, тәбрикләү максатыннан үз куллары белән бүләк ясадылар.

Хөрмәтле әбием, дәү әнием!

 Яшәгез сез мәңге яшь булып,

Туган йортыбызда ямь булып,

Сез булсагыз таза - сәламәт,

Оныкларга булыр бик рәхәт!

Яшь вакытның гүзәл мизгелләрен

Искә алып, дуслар, тагын бер

Яңгыратыйк әле бу залларда

Кайтавазын яшьлек таңының.

Үтте инде яшь вакытлар дип

Уфтанырга, дуслар, ашыкмыйк

Сүнмәгән бит, бездә сүрелмәгән,

Җыр биюгә булган гашыйклык.

Безнең йөрәк әле һаманда яшь

Онытмадык матур көйләрне

Жырлыйк әле өзеп үзәкләрне,

Булсын дуслар сагынып сөйләрлек.

Бүген бакчабызда 1 октябрь - Өлкәннәр көне үңаеннан "Бер очрашу үзе бер гомер" исеме астында бәйрәм үткәрелде. Бакчабызда озак еллар хезмәт куеп лаеклы ялга чыккан хезмәттәшләребез килде. Бәйрәм мөдир Миләүшә Корбангалиевнаның колавы белән башланды һәм балаларның, педагогларның чыгышы белән дәвам итте. Дилбәр Фатыйховна җитәкчелегендә Әлфия Мөбәрәкҗановна, Наилә Гараевна җырлар башкардылар. Күңелле очрашу чәй табыны янында дәвам итте. Хезмәттәшләребез бергә эшләгән елларны искә алдылар. Шушындый очрашу үткәргәннәре өчен һәр хезмәткәргә рәхмәтләрен җиткередләр.

Сезнең тормыш юлы матур тарих,

Күпләр өчен үрнәк булырлык.

Рәхмәт, дибез, сезгә чын йөрәктән,

Сезнең гомер — безнең горурлык.

Йөрәкләрдән чыккан назлы сүзләр,

Күңелләрдә булган саф хисләр,

Озын гомер якты тыныч тормыш -

Безнең сезгә әйтер теләкләр.

Менә без көткән алтын көз

Урманга килеп җитте.

Агачларның яфракларын

Сарыга буяп үтте.

Миләш кызыл мәрҗән киде,

Каен — алтын күлмәген.

Һәммәсе дә яраттылар

Юмарт көзнең бүләген.

Көз агачларны буяды,

Киендерде, бизәде.

Көзгә рәхмәт әйтеп урман

Чуар яулык изәде.

Мәктәпкә әзерлек, зурлар төркемнәрендә "Көзге матур бер көндә" исеме астында бәйрәм иртәсе үткәрелде. Балалар көзге табигатьнең сихри матурлыгын тасвирлап шигырьләр сөйләделәр, җырлар башкардылар. Сөмбелә белән тапкырлыкта, өлгерлектә сынаштылар, бергә әйлән-бәйлән уйнадылар, биеделәр. Бәйрәмне ямьләндереп кояш, болыт, тычкан, куян, яшелчә, җиләк-җимеш кунакка килделәр.

Безнең бакча биләмәсе берсеннән-берсе матур, аллы - гөлле чәчәкләргә күмелгән. Беренче кечкенәләр төркеме балалары саф hавада көзге табигатьнең матурлыгын, үзгәрешләрен кузәттеләр, бакча тирәли үскән чәчәкләргә, аларның төсләренә  игътибар иттеләр. "Күбәләкләр һәм чәчәкләр" уенын уйнап алган белемнәрен ныгыттылар. 

Балаларны татар халкының ел фасылларына караган йолалары, бәйрәмнәре белән таныштыруны дәвам итү, тырыш халыкның көз көне бай уныш җыеп алуын төшендерү, кыр эшләре тәмамлангач Сөмбелә бәйрәме үткәрелүен аңлату максатыннан бакчабызда "Хуш киләсең, ямьле көз!" исеме астында икенче кечкенәләр, уртанчылар төркемендә бәйрәм иртәләре уздырылды. Балалар Сөмбеләне каршылап җыр, биюләр башкардылар, шигырьләр сөйләделәр, табышмаклар чиштеләр, "Кем өлгер?", "Җиләк-җимеш, яшелчәләрне аер", "Гөмбәләрне таныйсыңмы?" уеннарын уйнадылар.