Һөнәри юнәлеш бирү эше кысаларында 11 нче сыйныф укучылары өчен Казан федераль университетының идарә, икътисад һәм финанс институты студентлары чыгышларын тәкъдим иттеләр. Алар укучыларга икътисади куркынычсызлык юнәлеше турында тулы мәгълүмат бирделәр.

Гимназиянең "Алдынгылар хәрәкәте"нең беренчел бүлек советы рәисе Галиев Нияз Космонавтика көненә багышланган "Беренчеләр космоста" дигән темага сөйләшүләр, "Алдынгылар вакыты" исемле интеллектуаль викторина уздырды. Укучылар галәм, космонавтлар, планеталар турында сорауларга бик кызыксынып җавап бирделәр.

Гимназиябезнең 1Г сыйныфы укучылары сыйныф җитәкчеләре Алсу Габдрафиковна белән берлектә Казан Кремле территориясендә урнашкан "Хәзинә" Милли сәнгать галереясендә экскурсиядә булып кайттылар. Укучылар яңа мәгълүматлар тупладылар, уңай эмоцияләр алдылар.

8 нче апрель көнне үткәрелгән "Мөһим сөйләшүләр" дәресе "Мин Җирне күрәм! Ул бик матур!" дип аталды. Укучылар белән галәм, беренче ачышлар, космонавтлар турында сөйләшү алып барылды.

7 апрель- Бөтендөнья сәламәтлек көне буларак билгеләп үтелә. Китапханәбез дә бу көннән читтә калмады. 2Б сыйныфы укучылары белән китапханәче Зөлфия Рафаильевна һәм физик тәрбия укытучысы Әлфия Гомәровна җитәкчелегендә "Сәламәтлек иленә сәяхәт" дигән күңел ачу чарасы уздырылды. Укучылар көчләрен төрле этапта сынадылар:
- физик яктан сәләтләрен күрсәттеләр;
- табышмаклар чиштеләр, мәкальләр төзеделәр;
- шәхси гигиена кирәк- яракларын сортладылар;
- әдәбият станциясендә җиләк- җимеш һәм яшелчә геройлары булган әкиятләрне искә төшерделәр;
- "Ни өчен үлән чәйләре файдалы?", "Ни өчен витаминнар эчәргә кирәк?", "Нәрсә ул дәрес туклану?" дигән сорауларга җаваплар эзләделәр.
Әлеге чара укучыларга бик күп уңай эмоцияләр бирде.

Гимназиянең 1В сыйныфы укучысы Ибатова Сәминә һәм 3А сыйныфы укучысы Валеев Рамазан "Золотая Лира" Халыкара балалар һәм яшүсмерләр сәнгате конкурсында катнашып II дәрәҗә дипломант исемен яуладылар. Котлыйбыз!!!

"Шигърият бакчасында" исемле республикакүләм катнашу хокукы алган I шәһәр әдәби - иҗат бәйгесенең "Сәнгатьле сөйләм" номинациясендә гимназиянең 2А сыйныфы укучылары Хайруллин Салих - l дәрәҗә, Гараева Сәмирә, Самикова Мәликә - ll дәрәҗә, 3А сыйныфы укучылары Гараева Сәидә - l дәрәҗә, Махмутов Рәсүл - ll дәрәҗә дипломга лаек булдылар. Җиңүчеләрне һәм укытучылары Гөлфия Рөстәмовнаны, Дания Габдулловнаны чын күңелдән котлыйбыз! Афәрин!

Гимназиядә 1 нче апрельдән 17 нче апрельгә кадәр "Туберкулёзга каршы көрәш" атналыгы дәвам итәчәк. Атна кысаларында 6 нчы, 7 нче сыйныфлар белән "Туберкулёзны профилактикалау" темасына сәламәтлек дәресләре уздырылды. Укучылар әлеге чир, аның куркынычы һәм саклану чаралары белән таныштылар.

Инклюзив белем бирү атналыгы кысаларында тәрбия эшләре буенча директор киңәшчесе Гөлчәчәк Әсхатовна башлангыч сыйныфлар белән "Без төрле – без тигез" дип аталган толерантлык дәресе уздырды. Сөйләшү барышында "Отличия" дигән уен оештырылды, мультфильмнан өзекләр күрсәтелде.
Шулай ук 5 нче, 6 нчы сыйныфлар белән "Төрле мөмкинлекләр – тигез хокуклар" дигән әңгәмә үткәрелде.
Әлеге чараларның төп максатлары:
- укучыларда дуслык, үзара ярдәмләшү, җаваплылык, бер- береңне аңлау һәм кабул итү сыйфатларын үстерү;
- аерым ихтыяҗлары булган кешеләргә җәмгыятькә яраклашырга ярдәм кирәклеген аңлату.

1 нче апрельдән гимназиядә инклюзив белем бирү атналыгы башланды. Әлеге атна кысаларында укучылар белән "Инклюзив дуслык" дип аталган әңгәмәләр үткәрелде. Укучылар толерантлык төшенчәсе белән таныштылар, бер- береңә терәк булу турында сөйләштеләр.