"Наркотикларсыз тормыш" айлыгы кысаларында бүген 5-9 нчы сыйныф укучылары мәктәпкүләм баскетбол турнирында катнашты. Команда зачетында 8 нче сыйныф укучыларына тиңнәр булмады. Афәрин! Кызларның бу җиңүе аларны спортның башка төрләрендә яңа җиңүләргә рухландырсын иде.

"Наркотикларсыз тормыш" акциясенең безнең мәктәптә ничек узуын белергә теләсәгез, "Көмеш кыңгырау" газетасының быелгы 43 нче № ын укыгыз.7 нче биттә 6 нчы сыйныф укучысы Колмөхәммәтов Илсафның "Модадан артта калмагыз" язмасы шул хакта сөйли.

Бүген укучыларыбыз көзге каникулга таралды. Каникул - үзеңнең белемеңне күтәрү,  дәрестән тыш чараларда катнашу өчен иң кулай вакыт . "Наркотикларсыз тормыш" айлыгы кысаларында каникул чорында  укучыларга Халыклар бердәмлеге көненә һәм Республикабыз Конституциясе көненә багышланган өстәл теннисы, баскетбол, скиппинг буенча ярышларда актив катнашырга һәм расписание нигезендә түгәрәкләргә йөрергә тәкъдим ителде.

Айлык кысаларында мәктәптә "Оста куллар" һәм "Кул эшләре" түгәрәкләренең эш күргәзмәсе эшләячәк! 

Информатика укытучысы Зарипова Гөлүсә Марат кызы  5-9 сыйныф укучылары өчен "Куркынычсыз интернет" дәресе уздырды. Дәрестә интернет челтәреннән компьтер системасына, кәрәзле телефоннарга  гына түгел, ә шәхескә янаган куркынычлар турында да сүз барды. Укучылар хакерлар, шпион программалары, вирус кебек төшенчәләргә аңлатма алдылар. Дәрестә катнашучы барлык укучылар һәм укытучыларга, интернет челтәреннән материаллар йөкләгәндә,  телефон номерлары, банк карточкасы номерлары һәм үзең турында  шәхси  мәгълүматларны информациягә алмашка җибәрергә ярамаганлыгы кисәтелде. Дәрес материалы барлык укучылар һәм укытучылар өчен файдалы булды.

Мәктәбебездән Зөлфәт Колмөхәммәтов район күләмендә Республикабыз Конституциясе көненә багышланган   фотоконкурста "Минем мәктәп" номинациясендә беренче урынга лаек булды. Зөлфәтне һәм аның җитәкчесе Курамшин Р.Х. бу җиңүләре белән котлыйбыз, иҗади уңышлар телибез

"Наркотикларсыз тормыш" айлыгы кысаларында мәктәп укучылары   Киекле авыл җирлеге рәисе Ганиев Р.Г. һәм авыл халкы  белән берлектә  авылыбыз урамнарына һәм мәктәп территориясенә агачлар утыртуда катнашты. Шушындый мәгънәле гамәлләрнең мәктәптән тулаем авылыбыз территориясенә  җәелүе, әти-әниләрнең балалар тормышы белән янып яшәвенә барыбыз да бик шатланабыз.  Ялларыбызның да шушылай бердәм үтүе балаларыбыз киләчәгендә матур чагылыш тапсын иде!

Сурәттә Клуб урамында без утырткан агач үсентеләре. 

1-4 нче сыйныф укучылары "Наркотикларсыз тормыш" айлыгы кысаларында үткәрелгән  "Уңыш бәйрәме"ндә үзләренең иҗади осталыкларын күрсәтте, тапкырлык, зирәклек, уеннарда җитезлек тә сыналды биредә. Бәйрәмдә табигый материаллардан ясалган әйберләр, тематик рәсем күргәзмәсе дә оештырылган иде. Бәйрәмнең иң күңелле мизгеле, мөгаен, ашханәдә әти-әниләрнең балалар өчен әзерләгән өстәле булгандыр. Көзге уңыштан бәрәңге бәлеше, кабак бәлеше дә, җиләк-җимеш, яшелчә, төрле тәмле салатлар - әниләрнең аш-сага булган бөтен осталыкларын бары тик яхшы яктан гына ачкан иде. Мәктәп тормышында актив катнашканнары өчен әти-әниләргә зур рәхмәт! 

5-9 сыйныф укучылары  "Наркотикларсыз тормыш" айлыгы кысаларында уздырылган  бәйрәмгә бөтен күңелләрен биреп әзерләнгән. 6 сыйныф җитәкчесе  Гөлүсә Маратовна эшкәртмәсе буенча узган бу бәйрәмдә җыр-бию, уен-көлке тынмады. Зал бизәлеше үзе генә дә ни тора!  Көз фасылында туган укучылар һәм укытучыларны, сәхнә түренә  чакырып,  туган көннәре белән тәбрикләү бигрәк тә тәэсирле булды. Бәйрәмнең елдан-ел яңаруы, укучыларның бетмәс-төкәнмәс фантазия байлыгына сокланабыз без. 

"Уңыш бәйрәме" нә әзерлек бөтен мәктәп рухын биләп алган. Бу- 1 нче сыйныфлар күргәзмәсе, мәктәпкә үз яңалыкларын алып килгән беренчеләргә һәм аларга ярдәм иткән әти-әниләр-АФӘРИН!

Мәктәбебез Республика күләмендә игълан ителгән "Наркотикларсыз тормыш" акциясенә кушылды. Укучылар бу уңайдан оештырылган төрле конкурсларда, чараларда актив катнашырлар дип көтәбез!