Бүген 1-4 сыйныф укучылары катнашында "Урман патшалыгында кунакта" исемле Яңа елны каршылау бәйрәме узды. Тамаша барышында маскалар чыгышы да, Кыш бабай белән Кар кызының Яңа елга изге теләкләре дә, мәктәп җитәкчелеге һәм әти-әниләр котлавы да, лотерея уены да уздырылды. Бәйрәм чарасын матур һәм эчтәлекле итеп әзерләгән һәм уздырган өчен башлангыч сыйныф укытучылары Ганиева Г.Ф., Хәсәншина Р.Н., Ганиева И.И. һәм озайтылган көн группасы тәрбиячесе Галиева А.Ф. әти-әниләр, укучылар һәм мәктәп җитәкчелеге исеменнән зур рәхмәтебезне белдерәбез.

Мәктәбебез шугалагы үзендә быелгы беренче кунакларны кабул итте. Киекле урта мәктәбе һәм Кизләү төп гомуми белем мәктәпләренең хоккейда иң кечкенә төркемнәре арасында иптәшләрчә очрашу узды. Уен,кунаклар хисабына 3:1 белән тәмамланды. Тәбриклибез, Сезне күршеләр, булдырдыгыз!

Әле быел гына бу уен дәрте белән яна башлаган башлангыч сыйныф малайларына исә алга таба уңышлар телибез, сынатмагыз, мәктәп данын алкалы хоккейда яклау- Сезнең кулда, без Сезгә ышанабыз!

5-9 нчы сыйныф укучылары өчен оештырылган Яңа ел тамашасы шундый исем астында узды.

Барлык укучыларны, укытучыларны, әти-әниләр, авылдашларны Яңа ел белән тәбриклибез. Яңа елда яңа уңышлар, зур бәхетләр, матур җиңүләр насыйп булсын. Яңа ел котлы булсын!

Мәктәптә Совет гаскәрләренең Әфганстанга кертелүенә 35 ел тулуга багышланган тематик чараны тарих укытучысы, "Туган якны өйрәнү" түгәрәге җитәкчесе Рәхимова Т.А. уздырды.  Чара бик тәэсирле булды, укучыларыбыз күңелендә ул озак сакланыр, авылдаш әфганчылар турында әле тагын күп материаллар тупланыр, эзләнү эшләре язылыр. Егетләребезгә канлы сугышларны күрү  язмасын, илебез күге аяз, ил-көннәребез тыныч булсын иде.

Агымдагы елның 4 нче кварталы өчен уздырылган Республикакүләм Чисталык дәресе туган ягыбызда кышлаучы кошларны кайгыртуга багышланды. Дәрес төрле сыйныфларда төрле формада узды: әңгәмә,  лекция, мастер-класс.... Иң нәтиҗәлесе - "Оста куллар "  түгәрәгенә  йөрүчеләрнең кошлар өчен ясаган җимлекләре, әлбәттә.  

Курыкмагыз, кошлар, сез,

күреп яныгызда без барын!

Зыян түгел, җим салырбыз,

Җырларыгызны тыңларбыз!

Бүген мәктәбебезнең уку алдынгылары, тимурчылык һәм волонтерлык хәрәкәте активистлары, Форпост һәм СМС-балалар отряды әгъзалары район Башлыгы Чыршы бәйрәмен тамаша кылдылар. Район җитәкчелегнә балаларга Яңа ел могҗизасы бүләк иткән өчен чын күңелдән рәхмәтебезне җиткерәбез.

IT -чемпион конкурсында 7 нче сыйныф укучыбыз Исмоилова Айгөл, районда иң күп балл җыючы буларак, ноутбукка лаек булды. Айгөл, уңышың дәвамлы булсын, без Синең өчен бик шат!

Бүген мәктәбебезнең 6-9 нчы сыйныф яшүсмерләре катнашындагы хоккей командасы Киекле урта мәктәбендә узган районыбызның авыл мәктәпләре арасында алкалы хоккей сезонын ачу ярышларында ктанашып, 2 нче урынга лаек булды. Афәрин, алга таба да уңышлар юлдаш булсын!

Бүген мәктәбебездә авыл китапханәсе белән берлектә якташыбыз -шагыйрь, җәмәгать эшлеклесе , журналист-  Илдус ага Диндаров белән очрашу кичәсе уздырылды.  Кичә барышында әдипнең биографиясе турында да,  әдәби һәм иҗтимагый эшчәнлеге турында да сөйләнде, укучыларыбыз Илдус абый әсәрләрен яттан да сөйләделәр. Ә шулай да иң кызыкгы һәм иң тәэсирлесе Илдус абый Диндаровның  үзе турында, мәктәбебез тарихы, гаиләдә милли тәрбия турында сөйләве булды. Кичәбездә Сәмигулла Рәхмәтуллинның Илдус абый сүзләренә җырлаган җырлары, авыл мәдәният йорты хезмәткәрләренең чыгышлары да бик урынлы булды. 

Очрашу барыбыз күңелендә дә бары тик җылы тәэсирләр һәм күңелле кичерешләр генә калдырды. Кичәне оештыруга зур өлеш керткән Билданова З., Ахметова Р., Галимова Б.  укучылар һәм укытучылар исеменнән зур рәхмәтебезне белдерәбез.