Балаларга бик кирәкле булган китап кыстыргычын бүген дә кулланалар. Ә безнең укучыларыбыз үз куллары белән төсле җепләрдән матур бизәкләр ярдәмендә китап кыстыргычын үрделәр. Үзләре эшләгән эшкә бик сөенделәр.

  Түгәрәктә укучылар вытынанка стиле буенча кәгазьдән төрле сурәтләр төшереп , кисеп картиналар ясадылар.

4нче чирек башыннан мәктәптә макулатура җыю башланды. Бу эшкә барлык укучылар да актив катнашалар. Иң күп макулатура алып килүчеләр Садретдинов Илсаф (4,2кг) һәм Кәлимуллин Булат (4кг) булды.

   5нче апрель көнне мәктәбебездә “Кошлар көне”нә карата әдәби иртә үтте. Укучылар кошлар турында презентация карадылар. Аннан үзләре  сәнгатьле итеп шигырьләр сөйләделәр, матур җырлар җырладылар, төрле башваткычлар чиштеләр .Ә соңыннан кошлар темасына кагылышлы уеннар уйнадылар, биремнәр үтәделәр.

  Галимова Ризидә җитәкләгән "Макраме" түгәрәгендә укучылар бүлмә гөлләре өчен матур-матур кашполар үрделәр.

25 нче март көнне мәктәбебездә ата-аналар җыелышы булып үтте. Көн тәртибе буенча мәктәп директоры 3 нче чирек нәтиҗәләре һәм мәктәп тормышындагы яңалыклар белән таныштырды. 4 нче сыйныф җитәкчесе Салахова К.Х. " Белем алуда балаларга ничек ярдәм итәргә" темасына доклад укыды. 1,3 нче сыйныф җитәкчесе Галимова З.В. "  Белем алу системасына ФГОСның килеп кирүе һәм башлангыч сыйныфларда проект эшчәнлеге   " темасына доклад укыды һәм үзенең укучылар белән эшләгән проектларын ата-аналарга күрсәтте.  Балалары проект эшләре белән шөгыльләнгәндә ата-аналарга да бу эштән читтә калмаска тәкъдим итте. 

    "Матурлык безнең янәшәдә" түгәрәгендә шөгыльләнүче укучылар 8нче Март бәйрәме уңаеннан әниләрен котлап төрле төсле җепләрдән бик матур итеп чәчәкләр үрделәр.

Безнең балалар бакчасында гүзәл әниләребезгә, әбиләребезгә багышлап бәйрәм кичәсе үтте. Кичәбез "Сөйкемле әниләр" исеме астында барды. Әниләребез, әбиләребез үз кызлары белән берлектә ярыштылар. Балалар үз куллары белән ясаган бүләкләрен әниләренә тапшырдылар. Тамашабыз конөерт номерлары белән бергә үрелеп барды. Ахырдан килгән кунакларыбызга чәй табыны әзерләдек. Көнебез бик күңелле үтте. Әниләребез кичәдән шат калдылар.

8 нче март бәйрәме безнең мәктәптә зур әзерлек белән үтте. Алдан укучылар әниләре турында бик матур иншалар язып килделәр, аларга дип үз куллары белән бүләкләр һәм 8 мартка багышлап рәсемнәр  ясадылар.

      Бәйрәм көнне мәктәбебез укучы малайлары хатын-кыз укытучыларны, техник хезмәткәрләрне һәм укучы кызларыбызны бәйрәм белән котладылар.
 Ә аннары кызлар "Эх, сез, матур кызлар!" бәйгесендә көч сынаштылар. 4 нче сыйныф укучысы Садретдинова Сөмбел "Иң тапкыр кыз!", ә 3 нче сыйныф укучысы Хайруллина  Рузилә "Иң уңган кыз! " номинациясендә җиңү яуладылар.

Бәйрәмебезгә кунак булып авылдашыбыз Кәлимуллин Халит Фәйзрахман улы килгән иде. Ул барлык укучыларны һәм укытучыларны котлап мәктәпкә матди ярдәм күрсәтеп принтер, сканер һәм ксерокопия бүләк итте. Без аңа бик рәхмәтлебез!

 25нче февраль көнне Акъяр башлангыч мәктәбе-балалар бакчасы ата-аналарының берләштерелгән  җыелышы булып узды. Җыелышта  мәктәп директоры Фархаев Ф.С. чыгыш ясады.Ул барлык катнашучыларны  Алабуга һәм Чаллы шәһәрләрендә килеп чыккан балалар белән бәйле фаҗигалардан соң ТР Президенты тарафыннан чыгарылган әмер белән таныштырды.Татарстан Президенты Р.Миннехановның мәктәпкәчә һәм кече мәктәп яшендәге һәр бала өчен җаваплы кешене билгеләргә  дигән әмере турында аңлатып үтте.