Бакчада Әниләр көне уңаеннан "Әниләрне яратыйк" дип исемләнгән балалар иртәсе узды. Балалар әниләренә багышлап күңелгә үтеп керерлек шигырьләр сөйләделәр, җыр җырладылар. Балалар тарафыннан әзерләнгән әкият әниләр күңеленә аеруча хуш килде. Бәйрәм әниләр белән чәй өстәле артында бергәләп чәй эчү белән тәмамланды.

Балалар белән иң гади математик күзаллауларны үстерү шөгылендә саннарны өйрәнүне ныгыту максатыннан төрле уеннар уйнадык.

Балалар белән республикакүләм үткәрелгән "Царица-Осень" дип исемләнгән конкурста кул эшләре белән катнаштык.

Бакчада "Исәнме, алтын көз" дип аталган көзге балалар иртәсе узды. Бәйрәмгә кунакка Керпе белән Көз кызының килүе бәйрәмне тагын да ямьләндереп җибәрде.

Бакчада  әти-әниләр, балалар катнашында көзге байлыклардан үз куллары белән ясалган кул эшләреннән "Алтын көз" дип исемләнгән күргәзмә оештырдык. Күргәзмәдә барлык әти-әниләр дә актив катнаштылар.

 Балалар әвәләү шөгылендә чыршы күркәләре һәм пластилин кулланып тычкан ясадылар. Табигый материаллар куллану балаларның иҗади сәләтләрен үстерә һәм шөгыльгә кызыксыну уята.

Бакчада балалар хезмәт тәрбиясенә өйрәнеп үсәләр. Хезмәт дөрес оештырылганда бала шатлык хисләре кичерә, хезмәтнең тәмен тоя.

Авыл мәдәният йорты белән берлектә бакчада "Икмәк барысына да баш" дип аталган чара узды. Балаларга игенче хезмәтенең асылы турында сөйләдек, икмәк өстәлләребезгә килеп утырганчы нинди юллар үтүе, аның кадере турында төшендердек.

Әтиләр көне уңаеннан балалар күңел җылыларын биреп, үз куллары белән әтиләренә бүләк ясадылар һәм музыкаль видео сәлам җибәрделәр.

Гаилә елы кысаларында юл хәрәкәте кагыйдәләрен өйрәнү, транспорт травматизмын булдырмау һәм пропагандалау максатыннан үткәрелгән "Гаиләгә - төп юл!"  дип исемләнгән район бәйгесе узды. Бәйгедә безнең бакча данын Маликовлар гаиләсе яклады. Алар барлык биремнәрне уңышлы үтеп,  "Иң закон тыңлаучан гаилә" номинациясендә җиңү яулады. Маликовлар гаиләсен чын күңелдән котлыйбыз, киләчәктә дә иҗади уңышлар һәм җиңүләр телибез.