"Авырмыйм, сәламәт булам" дисәң, көнне иртәнге зарядкадан башларга кирәк. Безнең укучыларыбыз да, яңа уку көннәрен зарядка ясаудан башлыйлар.

Менә, шаулатып-гөрләтеп 1 сентябрь - Белем бәйрәме үтеп китте. Һәрберебез өчен дулкынландыргыч булып торган бу көнне, 1 нче сыйныфка укырга кергән 11 кошчыгыбыз өчен, беренче кыңгырау чыңлады. Өлкән сыйныф укучылары өчен, мөгаллимнәре җитәкчелегендә, үрләр яуларга, яңа этап башланды. Барысына да яңа уку елында уңышлар, зур җиңүләр теләп калабыз. 

Укучыларыбызны, укытучыларыбызны, килгән кунакларны котларга Журавлева Юлия Викторовна һәм Сафина Лилия Рәшит кызы килгән иде.

Бүген балалар район үзәгенә сәяхәткә бардылар: янгын сүндерү оешмасы, ипи пешерү комбинаты, "Кайбыч таңнары" газетасы редакциясе белән якынрак таныштылар. 

Бүген "Кояшкай" ял лагерендә «Без наркотикларга каршы» дигән  темага багышланган чара үткәрелде. Тере  табигатькә  нигезләп  балаларга тормышның  матурлыгын, яшәүнең ямьлелеген, кошлар сайравында, сулар  агышында, чәчәкләрнең  матурлыгында икәнен аңлатырга  тырыштык. Наркотикларның  зарары, аны  кулланучыларның  шушы  матурлыкны  күрә, тоя  алмаулары  турында  әңгәмә кордык. Рәсем конкурсы оештырдык, хәрәкәтле уеннар уйнадык.  Балаларга  чара   бик ошады.  

Бүген Кошман авылы мәдәният йортында балалар күңелле уеннарда катнаштылар. Бүгенге көнебез бик күңелле һәм файдалы үтте.

Бүген "Кояшкай" мәктәп яны ял һәм сәламәтләндерү лагерына йөрүче балалар Олы Кайбыч авылында урнашкан Кайбыч ягы  музеена сәяхәт кылдылар. Төшке аштан соң исә мәктәп бакчасында чистарту эшләрендә катнаштылар, хәрәкәтле уеннар уйнадылар. Көнебез бик мавыктыргыч һәм файдалы үтте.

Бүген "Кояшкай" мәктәп яны ял һәм сәламәтләндерү лагерында көнебез "Без тарихта эзлебез" исеме астында үтте. Төп максат: балаларга Кошман авылы тарихы турында мәгълүматлар җиткерү, аларда кызыксыну уяту. Шул максаттан авылның истәлекле-тарихи урыннарына экскурсия, бу темага әңгәмәләр оештырылды. Балалар үзләре дә кайбер тарихи вакыйгалар турында белешеп килгәннәр иде. Шулай ук бүген алар авылыбыз мәчетенең тарихы белән таныштылар.

Бүген балалар авылыбыз эшмәкәрләрендә кунакта булдылар. Табигатьнең иң матур, иң чиста урынына урнашкан "Сайранов Р.Р." крестьян-фермерлык хуҗалыгы тавык фермасы экологик яктан чиста тавык ите җитештерә. Балалар биредә ферма белән танышып, саф һава сулап, күңелле ял итеп кайттылар. Төшке аштан соң малайлар һәм кызлар арасында шашка ярышлары үтте.