Афәрин! Районыбызның 1998-1999 нчы елгы җыелма яшь хоккейчыларының "Алтын алка" клубы командасы, Болгар шәһәрендә А.В. Тарасов призына үткәрелгән Республика ярышларында җиңү яулап, беренчелекне алып кайттылар. Бу җиңүдә мәктәбебездән һөҗүмче булып барган Низамиев Динарның да өлеше гаять зур. Афәрин, егетләр! Киләчәктә дә сезгә зур уңышлар телибез!

    Тукай һәм туган тел төшенчәләре гел янәшә.

    21 нче февраль көнне мәктәбебезнең бер төркем укучылары Казанга Габдулла Тукай музеена барды. Үзләре өчен кызыклы мәгълүмат туплап, сәяхәттән бик канәгать калды алар.

    Г. Камал театры директоры Якупов Илфир Илшатович һәм мәдәният министрлыгыннан А. М. Сибагатуллин тарафыннан "Тамчы - шоу" интеллектуаль уенында актив катнашкан өчен безнең мәктәп укучылары Камал театрына билетлар белән бүләкләнде. Ә мәктәп директоры Р. В. Низамиев  2 автобуста сәяхәт итүне бушлай оештырды. "Ватанны саклаучылар көне" уңаеннан ясалган шундый олы бүләкне оештыруның башында тынгысыз йөрәкле Римма Наиловна булды, әлбәттә. Мәктәпнең 21 укучысы И. Зәйниевның "Бабайлар чуагы"н карап, ял итеп кайтты.

   Быел да мәктәптә "Аҗаган" уены оешкан һәм күңелле үтте.

    18 нче февральдә Закирҗанов Раушан Фәритович I - IX сыйныф укучылары белән "Яшь коллекционер" кичәсе уздырды. Укучылар - маркалар, иске акчалар, открыткалар, йомшак уенчыклар, магнитлар, вак уенчыклар коллекцияләгәннәр.

    IX сыйныф укучысы Ибрагимова Айгөл үзенең коллекцияләренең төрлелеге һәм күплеге белән аерылып торды Ул вак йомшак уенчыклар, фарфор сувенирлар һәм гаилә белән спортта ирешкән уңышлары өчен алган грамоталарын, медальләрен коллекцияләгән.

   Бүген "Наз" социаль яклау бүлегеннән, укучыларны ГИА га психологик яктан әзерләү өчен, шулай ук укытучыларның психологик халәтен ачыклау өчен, мәктәбебезгә психологлар Корбанова Энҗе Василовна һәм Закирова Гүзәл Нурулловна килде.

   Мәктәптә укучыларга "Шахмат җене" кагылды. Тәнәфесләрдә, дәрестән соң коридорда торган шахмат өстәлендә "кайнар" шахмат уеннары бара.

    16 нчы февраль көнне I сыйныф укучыларының  "Әлифба" бәйрәме узды.

   14 нче февраль көнне тарих укытучысы Камалиева Нурсөя Гафиулловна IX сыйныф укучылары белән "Барыбыз да коррупциягә каршы!" дигән темага ачык чара уздырды.

   14 нче февральдә мәктәбебездә зур вакыйга - "ТНВ" каналыннан кунаклар килде. Алар безнең мәктәп тормышы һәм тәрбия өлкәсендәге эшчәнлек белән танышып, "Яшь ТНВ" каналының "Мәктәп" тапшыруына мәгълүмат тупладылар һәм телевидениегә төшерделәр.