Бүген мәктәпкүләм Көзге ярминкә үткәрелде.

Укытучы һәм остаз елы уңаеннан мәктәбебезнең Алдынгылар хәрәкәте членнары мәктәпкүләм Рәхмәт тактасы булдырды. Бу тактага укытучыларга багышланган мактау, рәхмәт сүзләре урнаштырылды. Әлеге эш 2023 нче елның ахырына кадәр дәвам итәчәк.

Укытучылар көне уңаеннан мәктәптә укучылар тарафыннан "Укытучы дигән бөек исем" дип аталган бәйрәм оештырылды. Бәйрәмнең кунаклары - ветеран укытучыларыбыз. Алар өчен чәй табыны да оештырылды.

Барлык укучылар да "Яраткан укытучыма открытка" акциясендә актив катнаштылар.

Өлкәннәр декадасы кысаларында мәктәбебездә ел саен үткәрелә торган матур бер гадәт бар: укучылар үзләренең әби-бабайларын котлап, аларның өйләрендә булалар, тәмле күчтәнәчләр бүләк итәләр. Бу гадәтне без үзебезчә матурлап "Әбиемә пирог" дип йөртәбез.

Авыл китапханәсендә Өлкәннәр көне уңаеннан әбиләр өчен бәйрәм кичәсе үткәрелде. Кичәдә 3-4 сыйныф укучылары һәм аларның әбиләре катнашты. Авылыбыз сандугачы Әкълимә апа Хәбибуллина үзенең матур җырлары белән кичәне тагын да матурлады.

Бүген укучылар белән очрашуга Ульданов Нурсилне чакырдык. Казан шәһәрендә Росгвардиядә хезмәт итүче үзебезнең элеккеге укучыбыз Нурсил бик кызыклы итеп хезмәте, эше, гаиләсе, мәктәп еллары турында сөйләде. Акыллы, сабыр, чын ир-егет үрнәге дип барыбыз да сокланып карап утырдык. Эшендә уңышлар гына насыйп булсын. Хәрби бәрелешләр булган җирләргә командировкага еш йөрүләрен дә яшермәде ул. Юлларың гел тыныч, имин булсын. Укучылар һәм укытучыларың сиңа саулык-сәламәтлек, гаилә бәхете, күңел тынычлыгы тели. Без синең белән горурланабыз, Нурсил.

Һәр баланы үз сабые сыман
Иркәли ул сөя ярата
Хөрмәт йөзе берүк сүрелмәсен
Тәрбиячеләргә карата

Эшегезгә тугры булганыгыз өчен
Рәхмәт әйтә әти-әниләр.
Тәрбияче икенче әни дип
Юкка гына, юкка әйтмиләр

Мәңге балкыр кояш гомерләре
Җылы нурларына сез ия
Сабыйларны бердәй тигез күреп
Биргән өчен дөрес тәрбия.
1 нче сыйныф укучылары бәйрәм уңаеннан балалар бакчасында булдылар, бик якын булган тәрбияче апаларын котладылар.