15 нче сентябрь - Варислар көнен билгеләп үтү максатыннан Борханова Римма 2 нче сыйныф укучыларын "Эзтабарлар" сафына кабул итү сборы оештырды. Сборда 1 - 4 нче сыйныф укучылары катнашты. Сыйныф җитәкчесе укучыларны эзтабарлар девизы, эш юнәлеше, кагыйдәләре белән таныштырды. Сбор шигырьләр, җыр, бию белән чиратлашып барды. Шулай ук укучыларның һәрберсе "Эзтабар" анты бирделәр. Соңыннан укучылар өчен сыйныф җитәкчеләре "Эрудит" уены да оештырды.

Укучыларыбыз уку белән беррәттән мәктәп яны тәҗрибә участогында хезмәт куялар. Көзге уңыш быел мулдан: кишер, чөгендер, суган, кәбестә ише яшелчәләрне җыеп бетердек, чират бәрәңгегә җитте. 

Сентябрь ае иминлек һәм экстремизмга каршы көрәш айлыгы булып билгеләнде. Мәктәбебездә ай дәвамында төрле тәрбияви чаралар, кагыйдәләр белән танышу, төрле ситуацияларда үз-үзеңне тоту кебек эшләр башкарылды. Күәм авылы җирлеге китапханәчесе Вафина Луиза да әлеге айлыктан читтә калмады. Ул 6 нчы сыйныфлар өчен "Терроризм - дөнья афәте" дигән исем астында тәрбия сәгате уздырды. 

5 нче сыйныф укучылары өчен сентябрь ае адаптация чоры. Шул уңайдан төп фәннәрдә укучылар мониторинг үтәләр. Бүген математика фәненнән белемнәрен тикшерделәр.

"Укытучы - остаз" гранты җиңүчеләре безнең мәктәбебездә укытканын күпләр белә инде. Аларның укыту, балаларга белем бирүдән кала төп эшләре яшь укытучыларны мәктәпкә әзерләү, укучыларга дәрес бирү сыйфатын арттыру һәм методик яктан ярдәм итү. Шул уңайдан биология укытучысы Гыйззатова Айсылу 6 нчы сыйныфлар белән остаз укытучы Хәкимҗанова Нурания катнашында дәрес бирде. 

Укытучы һәрвакыт эзләнүдә булырга тиеш, бигрәк тә яшь укытучы. Татарстан фән һәм мәгариф министрлыгы оештырган "Укытучы - остаз" гранты җиңүчесе Хәкимҗанова Нурания Идерисовна яшь укытучы Хәкимҗанов Фәниснең тарих фәненнән дәресен карап, анализлар ясады, төпле киңәшләрен бирде.