20-22 нче февраль көннәрендә Биектауда милли татар-башкорт көрәше буенча республика беренчелеге узды. Әлеге ярышта 9 нчы класс укучысы Гайнетдинов Динар 80 кг лы үлчәүдә 3 урынны яулады һәм Татарстан Республикасы Яшьләр, спорт һәм туризм министрлыгының Дипломы белән бүләкләнде. 

Югары Курса башлангыч мәктәбендә әтиләр белән берлектә күңелле кичә үткәрелде. Укучылар бергәләп ярыштылар, күңелле уеннар уйнадылар.

23 февраль - Ватанны саклаучылар көне. Барлык ир-егетләрне әлеге бәйрәм белән котлыйбыз! Күкләребез аяз, җирләребез тыныч булсын! Бәйрәм белән!

Ватанны саклаучылар көне уңаеннан Сарай-Чокырча башлангыч мәктәбендә "Без - булачак солдатлар" исемле әтиләр белән очрашу кичәсе үтте. Укучылар әтиләргә багышланган җырлар җырладылар, шигырьләр сөйләделәр, матур итеп биеп тә күрсәттеләр. 

Ватанны саклаучылар көне уңаеннан 8-9 нчы класс егетләре үзара ярыштылар. Алар үзләренең батыр, кыю, көчле икәнлекләрен күрсәттеләр.

20 февраль көнне Арча шәһәре стадионында профсоюз хезмәткәрләре арасында чаңгы ярышы булып узды. Мәктәпнең физик тәрбия укытучысы М.В.Минһаҗев әлеге ярышта 3 урынга лаек булды. Коллегабызны әлеге җиңүе белән котлыйбыз!

15 февраль - илебездә Ватаннан читтә хәрби бурычларын үтәүче россиялеләрне искә алу көне. Әлеге дата уңаеннан мәктәпнең ТИН укытучысы Сөнгатов Ш.Җ. укучылар алдында эчтәлекле чыгыш ясады, үзләренең тормышлары бәрабәренә Ватан боерыгын үтәгәннәр алдында зур бурычлы булуыбызны җиткерде.

15 нче февраль көнне Совет гаскәрләрен Әфганстаннан чыгаруга 25 ел тулу уңаеннан 8 нче класс укучылары "Әфганстан - йөрәк ярасы" исемле кичә үткәрделәр. Бу көнне Әфганстанда һәм башка кайнар нокталарда бурычларын үтәгән якташларыбыз хөрмәтенә бер минут тынлык игълан ителде, фильм күрсәтелде.

Бу акция кысаларында мәктәптә сәламәтлек дәресләре узды, ә башлангыч класс укучылары арасында чаңгы ярышы үтте.

6 нчы класс укучылары Садриева А., Мингазова З. тыл ветераны Хөснетдинова Фәймә апаның өенә барып, хәлен белделәр, аннан интервью алдылар.