21 март – Халыкара Урман көне. БМО инициативасы белән 1971 елда билгеләнә. Әлеге датаның төп максаты планетабыз халкын урман экосистемаларының әһәмияте, аларны саклау, урман мәйданнарын арттыру,торгызу кирәклеге турында таныштыру. Урман мәйданнарының кимүе, деградациясе – халыкара проблемага әверелде. Аны чишү дөньяның барлык илләре бердәм эш иткәндә генә булачак. Сүзсез урманнарның бетүе халык санының артуы белән дә тарихи бәйле. Урман территорияләре һәртөрле хуҗалык эшчәнлеге өчен уңайлы итеп үзгәртеләләр. Шулай ук янгыннар, корткыч бөҗәкләр, авырулар, уңайсыз табигать шартлары һәм башка сәбәпләр дә аларның мәйданнарын киметә. Ә нәтиҗә нинди соң? Һичшиксез глобаль дәрәҗәдәге проблемалар: туфрак эрозиясе, үсемлек һәм хайваннар күптөрлелеге кимү, су бассейннары үзгәреше, атмосферада углекислый газ артуы, яхшы үзагачның кимүе һәм ахыр чиктә кешелекнең тереклек потенциалы азаю. Укучыларыбызның шушы юнәлештә белемнәрен тагын да тулылындыру максатыннан “Урман дәресләре” үтте. 5-7 классларда – “Урман яшәеш” чыганагы дип аталган беседа үткәрелде. Биология –география укытучысы Х.Рузиля Рафиковна Россиядә урман зоналары турында презентациягә нигезләнеп информация биргәннән соң, урманнның әһәмияте турында укучылар белән эчтәлекле әңгәмә алып барды. “Урман Адәм баласына эшләргә көч-куәт биргән, аңа үзенең байлыгын бүләк иткән, гомер буена хезмәт кылган сихри урманнан башка тормышыбызны күз алдына китерүе кыен. Агачлар кадерле, яшәү өчен бик тә кирәкле . Мәсәлән, агачтан ясалган тараклар чәчне үстерә һәм нерв системасына уңай тәэсир итә. Баш авыртканда усактан ясалган ятакта ятарга кирәк. Үлән белән дәвалаучылар, усак энергияне ала да бирә, дип исәпли. Чыршы энәләренә ятсаң, ул арганлыкны бетерә. Бармакларыгызны нарат күркәләре арасына тыгып, бер генә минут тотып карагыз әле, шунда ук үзегездәге начар хисләрнең китә баруын сизәрсез” һәм тагын күп мәгълүматлар укучыларны һичшиксез кызыксындырды.

11 класс укучылары атна дәвамында мәктәпкүләм дежур тордылар. Һәрвакыттагыча гөлләрне дә игътибарсыз калдырмадылар.Күп еллар дәвамында биология укытучылары Рузилә Рафиковна белән берлектә гөлләрне яратып карадылар. Рәхмәт аларга. 

     Атна дәвамында 11 класс укучылары соңгы тапкыр мәктәпкүләм  дежур тордылар. Мәктәбебез директоры Рәзилә Габделнуровна  өченче чирекне йомгаклау линейкасында укучыларга бу мәсьәләдәге фикерләрегезне башкаларга  да җиткерегез диеп, сүз бирде. Укучыларның : "Мәктәпне саклагыз,безнең кебек матур булыгыз" һ.б.шундый фикерләре тыңланды. Укыту - тәрбия завучы Чулпан Миннуловна тулы отчетлар язып, эчтәлекле матур "Яшен" чыгарып дежурлыкка йомгак ясый торган класс булдыгыз, диеп мактады. Киләчәктә уңышлар сезгә, укучылар!

21 март көнне Арча мәдәният йортында "Созвездие - Йолдызлык - 2015" фестиваленең гала-концерты узды. Мәктәбебезнең яшь "йолдызчыклары" Ахмадуллина Лилия (җитәкчесе - Самигуллина Ч.М.) һәм Елисеева Камилла (җитәкчесе - Тазетдинова Г.Р.) конферанс номинациясендә җиңүче-лауреатлар булдылар. Инде хәзер бик тырышып Биектауда узачак зона ярышларына әзерләнәләр. Кызларыбызга уңышлар телибез!

ВУЗлар турында материаллар туплау, кызыксыну, яңалыклар белән танышу, киңәшләшү дәвам итә...

21 март көнне үткәрелгән Нәүрүз бәйрәмендә без,11 класс укучыларына Карга боткасы пешерелгән күңелле ашханәдәге эшне оештыру йөкләнгән иде. Һәрберебезнең өлеше кергән төрледән-төрле ярмалар,тәмле җимешләр белән телне йотарлык ботканы саф һавада, кояш нурлары иркәләвендә, кошлар чыркылдашуында тәмләп ашадык. Повар апаларыбыз гадәттәгечә бик тәмле пешергәннәр иде. Өстәмәләр салдырып, кайнар чәйләр эчеп ошатып сыйланды дусларыбыз. Бәйрәмнең бик күңелле өлешенең  берсе иде бу - ашханә. Рәхмәт һәммәгезгә дә!

                 Кадерле дуслар!  Сезне халкыбыз йолаларының берсе- Язгы Яңа ел-Нәүрүз бәйрәме белән котлыйбыз!  Саулык-сәламәтлек, бәхет, уңышлар телибез!Барлык өметләрегез тормышка ашсын, Язгы Яңа ел котлы булсын! Нәүрүз мөбарәкбад!

Ә  мәктәбебездә  чын-чынлап бәйрәм рухы иде бүген. Урамда пешкән хуш исле, телеңне йотарлык карга боткасы ашау үзе генә дә ни тора! Укучыларыбыз тәмле ботка белән сыйландылар, төрле уеннар һәм җырлар ярдәмендә Яз килүен котладылар. Ә бәйрәмнең азагы символик карачкы ягу белән тәмамланды. Барлык начар гадәтләр алтынсу ут ялкынына чорналып безнең мәктәбебездән юкка чыкты. Бәйрәм белән!

            "70 еллыкка-70оя " акциясе кысаларында мәктәбебез укучылары күп итеп   сыерчык оялары ясады. Сыерчык оялары конкурсы буенча нәтиҗәләр  дә билгеле булды: башлангыч класслар арасында   1 урын-Гараева Назлыгөл, 2 урын-Тазетдинова Зәлия, 3 урын-Валиев Фаил, ә урта һәм югары өлештә 1 урын-Хәйруллина Ләйлә, 2 урын-Хадиев Илгиз, 3 урын-Нуриева Кадрия. Шулай ук номинацияләр буенча да урыннар билгеләнде. "Иң оригиналь сыерчык оясы" номинациясе-Хасанов Фәрит, "Иң җыйнак сыерчык оясы" -Каримов Камил, "Иң зур сыерчык оясы" номинациясе-" Гиззатуллин Айназ, Муртазин Булат ,  "Иң ишле гаиләле сыерчык оясы" номинациясе- Шамсетдинов Рәдис һәм Шамсетдинова Рәмзия, "Иң нечкә билле сыерчыклар өчен оя" номинациясе-Хадиева Рамилә. Сыерчык оялары ясаган һәрбер укучыга һәм аларның әти-әниләренә олы рәхмәтләребезне җиткерәбез!  Туган якларыбызга матурлык бүләк итүче кошкайлар! Без сезне каршыларга әзер!