Бүген Шушмабаш мәдәният йорты каршындагы мемориал янында Бөек Җиңүнең 71 еллыгы уңаеннан тантаналы митинг үткәрелде. Митнингта сугыш чоры балалары, тыл ветераннары, авыл халкы, килгән кунаклар катнашты.Язгы кояшның мул итеп елмаюы, сугыш елларындагы матур җырлар, тәмле коймак исе иртәдән үк бәйрәм кәефе тудырды. Укучыларның ветераннарны эчкерсез котлап яңгыраган шигырь юллары, җырлар, легендар "Катюша" биюе  берәүне дә битараф калдырмады.  Сугышта һәлак булучы якташларыбыз һәйкәленә веноклар салынды. Дөньялар тыныч, күгебез аяз, гаиләләребез бөтен булсын!

     Бүген Шушмабаш урта мәктәбендә истәлекле вакыйга-  авылдашларыбыз Социалистик Хезмәт  Герое  Шәрифулла Сәгъдуллин һәм Александр Матросов батырлыгын кабатлаган батыр солдат Кәрим Исхаковка багышланган мемориаль такта ачылу тантанасы булды. Тантанада Арча башкарма комитеты җитәкчесенең социаль эшләр буенча урынбасары  Гарифзянов Рамиль Илгизович, якташларыбызның якыннары һәм туганнары, авылдашлар,ветераннар катнашты.Геройларның якыннары район җитәкчелегенә тирән ихтирамын, олы рәхмәтен җиткерде.      Шушы бөек кешеләр  безнең җирлектән булулары белән, аларның исемнәре тарих битләрендә зур хәрефләр белән язылып куелганлыклары белән без чиксез горурланабыз. 

Шекә башлангыч мәктәбе укучылары төрле конкурсларда катнашып торалар  ." Эш агачы һәрвакытта бик юмарт китрер җимеш." дигән Бөек шагыребез. Тырышсаң, һәрвакытта эшеңнең нәтиҗәсе уңай була.

5 нче май көнне Лесхоз урта мәктәбе базасында “Совет һәм Россия халкы тормышында Бөек Ватан сугышы” темасына Җиңүнең 71 еллыгына багышланган район күләмендә фәнни-практик конференция үтте.Бу чарада мәктәбебезнең татар теле һәм әдәбияты укытучысы Сабитова Т.Ә. катнашты.Ул"Үлемне җиңгән ветеран"темасына чыгыш ясады.Чыгыш ясаучыларга сертификат тапшырылды.

30 апрель көнне Арчаның №5 е гимназиясендә юлның яшь инспекторларының районкүләм бәйгесе"Имин тәгәрмәч-2016" булып үтте. Ул быел ГИБДД ның 80 еллык юбилеена багышланды. Барлыгы 37 мәктәп катнашты. Безнең мәктәпнең дә  4 укучысы Шакиров Рәзил, Каюмова Азалия, Сагдуллин Алмаз, Спиридонова Анна бу бәйгедә бик актив катнашып 1 урынны яуладылар. Аларны һәм аларның җитәкчеләре: Вильданов Р.Г.,ны Каюмова Г.Н.ны  уңышлары белән чын күңелдән котлыйбыз. Алда  тагын да зур уңышлар теләп калабыз.

Бүген укучылар Арча районының 5 нче гимназиясендә үткәрелгән баскетбол ярышында үзләренең көчләрен сынап кайттылар. Мактау грамотасы белән бүләкләнделәр.

28 апрель көнне Арча стадионында укытучылар арасында җиңел атлетика буенча ярышлар үтте. Укытучыларыбыз сынатмады. Эшкә дәрт алып, күтәренке кәеф белән яңа җиңүләргә рухланып кайттылар.

28 апрельдә Арчаның 5 нче гимназиясендә "Без Тукай варислары" дигән баш астында шигырь укучылар бәйгесе узды. Мәктәбебез укучылары уңышлы чыгыш ясады. 3 класс укучысы  Кәримов Таһир һәм 7 класс укучысы Әхмәдуллина Лилия 2 урынга лаек булды. 4 класс укучысы Фәттахова Айгөл "Тамашачы мәхәббәте" , 9 класс укучысы  Газизова Адилә "Сәхнәдә үзен оста тотучы" номинациясенә ия булды. Афәрин, булдырдыгыз!

Бүген 9-11 нче сыйныф укучылары белән очрашуга мәктәп инспекторы Нигъмәтуллин М.К. килде. Ул укучылар белән эшлекле әңгәмә корды.  Җәмәгать урыннарында, урамда үз-үзеңне дөрес тоту кагыйдәләре белән таныштырды. Укучыларны кызыксындырган сорауларга җавап бирде.