Экологик тәрбия бирүне тагын да тирәнәйтү максатыннан группа бүлмәсендә табигать почмагы бар. Анда без төрле гөлләр, аквариум һәм балалар хезмәте өчен кирәк булган әсбаплар урнаштырдык. Уртанчылар белән бүлмә гөлләре белән таныштырганда шөгыльне табигать почмагында үткәрәбез.Гөлләрнен яфрак формаларын, яфрак, чәчәк төсен күзәтәбез. Табигать почмагында төрле тәҗрибәләр, күзәтүләр алып барабыз. Бүлмә гөлләренең тере икәнлекләренә төшендерәбез: алар сулый, ничек сулый? – Яфраклары аша. Су эчәләр, тукланалар- тамырлары аша. Бер көнне караңгыга куеп су сипми торабыз. Моннан балалар белән бергәләп нәтиҗә ясыйбыз: гөлләр тере. Алар сулыйлар, тукланалар, үсәләр. Шуның өчен дә аларга яхшы шартлар тудырырга кирәк. Гөлләр һәрвакыт игътибар сорыйлар. Алар уссен өчен, безгә матурлык өстәсен өчен аларга яктылык, җылылык, су кирәк. Балалар моны бик яхшы аңлыйлар, табигать почмагында деҗур торалар, гөл яфракларының тузаннарын сөртеп, су сибеп торалар.

Балаларның сөйләм телен һәрьяклап камилләштерү өстендә эшлибез.Рус теле дәресләрендә балалар бик актив катнашалар. Интерактив чаралар эшчәнлекне тагы да отышлырак итә.

Өлкән тәрбияче Нигматзянова Суфия җитәкчелегендә мәктәпкә хәзерлек төркеме балалары "Рукавичка"әкиятен рус телендә сәхнәләштерделәр.Сәхнәләштерү уеннарында катнашып, балалар образлар, төсләр, авазлар аша тирә- юнь белән танышалар, ә сораулар балаларны уйларга, анализларга, йомгаклау ясарга мәҗбүр итә. Сәхнәләштерү эшчәнлеген алып барганда, hәр бала үзенең кичерешләрен, тойгыларын, теләкләрен, карашларын гадәти сөйләшкәндә генә түгел, ә чит тыңлаучылар алдында күрсәтә алырлык шартлар тудырырга hәм яшьтән үк өйрәтергә кирәк. Еш кына без киң белемле, сәнгатьле сөйләшә белүчеләрне оялчан икәнен, чит кешеләр алдында югалып калуларын күзәтәбез. Бу проблемалар булмасын өчен, балалар бакчасында театр кую бик зур булышлык күрсәтә. Сәхнәләштерелгән уеннар балаларны шатландыралар.

Балалар гади математик күзаллау формалаштыру эшчәнлегендә бик яратып шөгыльләнәләр.УМК материаллары ярдәмендә түгәрәк, өчпочмак, квадратны танып әйтергә; балаларны уң һәм сул кулларын, пространстводагы юнәлешләрне аера белергә өйрәтәбез;эшчәнлеккә кызыксыну , мөстәкыйльлек тәрбиялибез; игътибарлыкларын, логик фикерләү сәләтләрен үстерәбез.