Бүген "Гагарин белән 108 минут" акциясе кысаларында мәктәпкүләм сыйныф сәгате үтте. Укытучы Магсумова Г.Х. укучыларга  Юрий Гагаринның балачагы, тормыш юлы, батырлыгы турында презентация күрсәтеп  сөйләде.

"Гагарин. Йолдызларга беренче адым!"  рәсем конкурсына укучылардан эшләр килә башлады, нәтиҗәсе иртәгә билгеле булыр дип көтелә.

Бүген балалар шагыйрәсе Йолдыз Шарапова иҗатына багышланган "Шигъри йолдызлык" конкурсы нәтиҗәләре билгеле булды. 3 нче сыйныф укучысы Касыймова Л. - 1 урынга, 2 нче сыйныф укучысы Низамова А., 4 сыйныф укучысы Галәветдинова А. - 2 урынга, 1 нче сыйныф укучысы Фазуллина И., 4 нче сыйныф укучысы Касыймова К. - 3 урынга лаеклы дип табылдылар. Җиңүче һәм призёрлар грамоталар белән бүләкләнделәр. Калган укучыларга актив катнашканнары өчен сертификатлар тапшырылды.

Бүген мәктәп-балалар бакчасында балалар шагыйрәсе Йолдыз Шарапованың иҗатына багышланган чара булып узды. Кичәнең беренче өлешендә авыл китапханәсе хезмәткәре Сабирҗанова Р. Н. укучыларны шагыйрәнең тормыш һәм иҗат юлы белән таныштырды, эчтәлекле презентация күрсәтеп үтте. Кичәнең икенче өлеше "Шигъри йолдызлык" конкурсы  белән дәвам итте: укучылар Йолдыз Шарапованың  шигырьләрен  яттан сәнгатьле итеп  укыдылар. Конкурс нәтиҗәләре иртәгә атналык линейкада игълан ителер, җиңүчеләр грамоталар белән бүләкләнер.

Мәктәп-бакча китапханәчесе Галәветдинова И.Р. , балалар китабы атналыгы уңаеннан, аңлап хатасыз уку  буенча, укучылар арасында үзара контороль  оештырды.  Укучылар моны ярыш кебек кабул иттеләр: һәркемнең үз осталыгын күрсәтәсе килде.

Бүген түгәрәк җитәкчесе Магсумова Г.Х.  укучыларны күп төрле бүлмә гөлләре белән таныштырды, аларны тәрбияләү серләренә төшендерде.

Мәктәпкәчә яшьтәге балалар тәрбияче апаларының китап укыганын бик яраталар. Бүгенге эшчәнлек вакытында алар укылган әкиятне сәхнәләштереп тә күрсәттеләр.

1 нче апрель көнне шашка уеннары буенча сәләтле укучыларыбыз район ярышларында уңышлы чыгыш ясап кайттылар. Чумаков И. - 3 нче урынны,  Котдусов Р., Касимова Л., Галәветдинова А. 1 нче урыннарны яулап, Пешәнгер башлангыч мәктәбе командасы  җиңүче дип танылды. Ярышларда катнашкан укучыларыбызны, тренерлары Магсумова Г.Х.ны зур җиңүләр белән котлыйбыз. 

Бүген мәктәп-бакча китапханәчесе Галяутдинова И.Р. Балалар китабы атналыгы башлануын  игълан итте. Ул укучылар белән шул уңайдан әңгәмә үткәрде, эш планы белән таныштырды, китаплар күргәзмәсе оештырды.

Арча районында тәрбиячеләр арасында "Уен- мөһим эш" конкурсында тәрбиячебез Нигъмәтҗанова Л.А.  математика эшчәнлеге буенча дидактик уен тәкъдим итеп, 3 урын яулады. Хезмәттәшебезне уңышлары белән котлыйбыз, алда да иҗади уңышлар телибез!

https://ucsi.ru сайтында башлангыч сыйныф укучылары өчен рус теленнән "Русский с Пушкиным" онлайн-олимпиада башланды. Хәзерге вакытта сынау турлары бара, төп тур 12-19 апрельләрдә. Укучылар, барыбыз да актив катнашыйк!