21 февраль - Халыкара туган тел көне. Шушы уңайдан бакчабызда туган телебезгә багышланган кичә үткәрдек.Татар теле-безнең туган телебез, безнең горурлыгыбыз. 

И туган тел, и матур тел!

Саф татар милләт теле!

Бакчабыздан Галиуллин Риназ белән Гатауллина Назлыгөл республикакүләм бәйгедә катнашып дипломнар белән бүләкләнделәр. Афәрин, яңа уңышлар теләп калабыз.

Татар халкы бик борынгыдан ук аш-су әзерләргә оста булган, тәмле оригиналь ашлар пешергән. Милли ашларның үзенчәлеге халыкның тормыш рәвешенә бәйле булган. Татарлар элек-электән иген иккән,шуңа күрә оннан, ярмадан ашлар әзерләгән. Без бүген балалар белән халкыбызның милли камыр ашлары белән таныштык, кунак өстәле әзерләдек.

Муса Җәлилнең тууына 116 ел уңаеннан бакчабызга мәдәният хезмәткәрләре һәм китапханәче килделәр. Алар белән берлектә шагыйрьнең иҗатына багышланган матур кичә уздырылды.

Ел саен 15 февраль көнне герой шагыйрь Муса Җәлилнең туган көне билгеләп үтелә. Без дә бүген  шагыйрьнең иҗаты белән таныштык, шигырьләрен яттан өйрәнеп сөйләдек.

Максат: 1. Балаларда  шагыйрь иҗатына карата кызыксыну уяту; патриотик хис, туган илгә мәхәббәт тәрбияләү;

2.Патриот шагыйрьнең тормыш һәм иҗат юлы белән якыннан таныштыру .

Бүген авылыбызда 2021 ел нәтиҗәләре буенча отчет җыелышы узды. Бакчабыз эшчәнлеге буенча күргәзмә оештырдык. 

15 февраль - татар халкының легендасы Илһам Шакировның туган көне. Бүген балалар белән җырчының тормыш юлы, иҗаты белән таныштык, презентация карадык, җырларын тыңладык.

Кечкенәләр төркеменнән Мифтахов Хәлим әтисе Искәндәр белән республикакүләм бәйгедә катнаша. Аларга уңышлар телибез, нәтиҗәләрне көтеп калабыз.

Балаларга кечкенәдән үк “юл грамотасы” өйрәтү, аларда юл йөрү күнекмәләре формалаштыру, әти-әниләрнең, тәрбиячеләрнең изге бурычы.Балаларда юл йөрү кагыйдәләрен төгәл үтәргә омтылыш тәрбияләү балалар бакчасыннан башлана.

Безнең балалар бакчасында да нәниләрнең гомуми үсешенә ярдәм итүче, юлларда үз-үзеңне хәвефсез тотарга өйрәтүче төрле чаралар үткәрелә.Балаларга юл йөрү кагыйдәләрен өйрәткәндә төрле алымнар һәм методлар кулланыла.

Балалар кышны яраталар, чөнки бу елның иң матур вакыты. Кыш көне таудан шуу, чанада, чаңгыда һәм тимераякта йөрү , кар өстендә рәхәтләнеп уйнап йөрү мөмкинлеге бар.  Кыш көне ачык һавада хәрәкәтчән уеннар һәм күңел ачулар гаять зур шатлык  һәм сәламәтлеккә бәяләп бетергесез файда. Без дә бүген балалар белән рәхәтләнеп урамда уйнадык, уен мәйданчыгының карын көрәдек. Аларның матур, алсу йөзләренә карап күңел сөенә.