Бакчабызда бүген Яңа ел бәйрәме булып узды. Башта 1 нче кечкенәләр төркеменеке. Аларга кунакка Кыш бабай, Кар кызы, төлке һәм хәтта Свинка Пеппа да килгән иде. Аннары бәйрәм зурлар төркеме белән уздырылды. Балаларның күңелен ачарга убырлы, су анасы, клоун һәм төрле җәнлекләр килде. Балаларга бәйрәм бик ошады. Соңыннан Кыш бабай бүләкләр өләште.

Бакчабызда балалар белән Яңа ел бәйрәменә әзерлек бара. Залга матур итеп чыршы бизәп куйдык. 1 нче кечкенәләр төркеме балалары да үзләренең матур шигырьләрен, җырларын, матур биюләрен әти-әниләренә, Кыш бабай белән Кар кызына күрсәтергә әзерләнәләр. Кызларыбыз кар бөртекләре биюе биесә, малайлар гномиклар биюен бииләр.

1 нче кечкенәләр төркеме белән спортзалда төрле уеннар уйныйбыз. Кайбер балалар таудан шуа, кайберләре йомшак машиналарда йөри, төрле коврикларда сикерәләр. Балаларга күмәкләшеп уйнавы бик күңелле.

Бакчабызның мәктәпкә әзерлек төркеменә йөрүче Зиннатуллина Ләлә 18 нче декабрьдә Арчаның беренче номерлы балалар бакчасында үткәрелгән "Голосок" конкурсында 3 нче урынны яулады. Без аны чын күңелдән бу җиңүе белән котлыйбыз, алда да зур уңышлар теләп калабыз!

Бакчабыз ишегалдына матур итеп кар сыннары ясап куйдык. Бакча хезмәткәрләренә ярдәмгә әти-әниләр дә килде. Бергәләшеп күңелле итеп эшләдек. Булышкан әти-әниләргә бик зур рәхмәт!

Безнең бакчабызның музыка җитәкчесе Тимербаева Лилия Түбән Мәтәскә мәктәбе командасы составында йөзү ярышында катнашып III урынны яулады. Без аны ихластан котлыйбыз!!! Афәрин!!!

1 нче кечкенәләр төркеме белән өстәл  уеннары аша саннар өйрәнү. Максат: Балалар белән өстәл уеннары аша саннарны танырга, русча һәм татарча әйтергә, саннарның урыннарын табып, дөрес итеп урнаштырырга өйрәнү. 

Бакчабызда бөтендөнья инвалидлар көне уңаеннан  “Шәфкатлелек бизи кешене” темасына әдәби чара үткәрелде.          «Ачның хәлен тук белми» дигәндәй гарип кешенең җан сыкрануын сәламәт кеше ишетеп, аңлап җиткерми дә кебек. Тик ишетергә, аңларга тырышырга кирәк, бик кирәк. Язмыш тарафыннан кимсетелгәннәргә ярдәм кулын сузарга беркайчан да соң түгел. Кыйммәтле даруларга, катлаулы дәвалану чараларына һәм, иң мөһиме, безнең җылы карашка, таянычыбызга мохтаҗ кешеләр барлыгын онытмасак иде. Янәшәбездәге болай да үзләрен кимсетеп тойган дусларыбызга игътибарлырак булыйк, хәлләрен аңларга, күңел авазларын ишетергә тырышыйк, авыр тормышларына – терәк, сырхауларына – шифа, кайгы-хәсрәтләрендә юаныч булыйк.          

Тиздән Яңа ел бәйрәме җитә. Шул уңайдан без бакчабызны матурлап бизи башладык. Моңа балалар да шатланалар. Алар да Яңа елның тизрәк җитүен, Кыш бабайның бүләкләр алып килүен зарыгып көтәләр.

Мәктәпкә әзерлек һәм зурлар төркеме белән әвәләү дәресендә тозлы камырдан тәмлүшкәләр әвәләдек. Балалар өчпочмак, мантый, бәлеш, пәрәмәч, паштет, печенье, торт ясадылар. Тозлы камыр белән ясау балаларга бик ошады. Камыр каткач, балалар үзләре әвәләгән тәмлүшкәләрен краска белән буядылар. Ә соңыннан без аларны лаклап куйдык. Хәзер балаларга самовар янында чәй ясап уйнарга тәм-томнар да бар.