Бүген авылыбыз уртасында урнашкан "Батырларга мәңгелек дан!" һәйкәле янында Җиңү бәйрәме булды. Бәйрәмгә сугыш һәм тыл ветераннары чакырылды. Ветераннарны Кәче авылы ветераннар берлеге рәисе Солтанов Рәсим Солтанович, Арча шәһәре ветераннар берлеге рәисе Җамалиев Альберт Миңнегулович, Кәче авыл җирлеге башлыгы Закиров Тәлгать Дәүлиевич, Кәче төп гомумбелем мәктәбе директоры Муллахмәтов Нияз Наилевич бәйрәм белән тәбрикләделәр. Шигырьләр, җырлар белән үрелеп барган театральләштерелгән күренеш һәркемнең күңеленә хуш килде. Без ветераннар алдында аларның батырлыкларына баш иябез.

Ветераннар, ветераннар,

Сезгә хөрмәт- ихтирамнар,

Сез булганга матур булып,

Алсу булып ата таңнар!

Мәктәбебездә Бөек Җиңүнең 70 еллыгын каршыларга әзерлек эшләре дәвам итә. Укучылар технология укытучысы Копылова Г. Г. белән бик матур веноклар, чәчәкләр ясадылар, концерт номерлары, сценарий әзерләнде. Ветераннарга чакыру кәгазьләре, котлау открыткалары җибәрелде.

Арча укучылар сарае үткәргән "70 еллыкка - 70 бишле" акциясе тәмамланды. Мәктәп буенча җиңүчеләр билгеләнде: 2-4 нче сыйныфлар арасында - Мамаева Алинә, 5-7 нче сыйныфлар арасында - Шакирова Алинә, 8-9 нчы сыйныфлар арасында - Садыкова Энҗе. Әлеге укучылар 9 нчы май көнне Арча шәһәрендә узачак Җиңү парадында катнашачаклар.

Арча шәһәре стадионында мәгариф оешмалары арасында җиңел атлетика буенча ярышлар узды. Анда безнең мәктәптән дә укытучылар катнашты. Физик тәрбия укытучысы Хәйдәр Зәйнуллин кырык яшьтән өлкәнрәкләр арасында 400 метрга йөгерүдә  1 нче урынны яулады. Аны җиңүе белән котлыйбыз!

Арчаның бишенче гимназиясендә "Куркынычсызлык тәгәрмәче - 2015" чарасы үткәрелде. Бу көнне балалар юл йөрү кагыйдәләре, беренче медицина ярдәме, иминиятләүбуенча сорауларга җавап бирделәр, велосипедта төрле каршылыкларны үттеләр. Мәктәбебез укучылары әлеге бәйгедә актив катнашты.

Бүген Арча шәһәрендә Флеш Моб Батлл булды. Анда безнең укучылар да катнаштылар. Ул Бөек Җиңүнең 70 еллыгына багышланган иде.Барлык катнашкучылар да ике сәгать буе биеделәр. бәйрәм күңелле үтте.

Укучылар һәм укытучылар тарафыннан авылыбыз уртасындагы "Батырларга мәңгелек дан!"  һәйкәле төзекләндерелде, буялды. 

Бүген 4 нче сыйныф укучылары татар теленнән тест эшләделәр. Тест эшләүдә барлык укучылар да катнашты. 

Бүген 8 һәм 9 нчы сыйныфлар арасында бадминтон ярышы булды. 9 нчы сыйныф командасы җиңү яулады.