1 нче апрель Халыкара кошлар көне буларак билгеләп үтелә. Шул уңайдан балалар бакчасының кечкенәләр  төркеме балалары  белән   “Исәнмесез, кошкайлар!” дип исемләнгән  кичә үткәрелде.  (Тәрбиячеләр: Галиәхмәтова  Г.Ф., Хайруллина Г.Р.). Кошлар- жир йөзендә иң киң таралган тереклек ияләре.Алар табигатьнең күрке, яме, урман табиблары.Ялтыравыклы матур каурыйлары, нәфис гәүдәләре, нәни томшыклары,  матур  җыр-моңнары белән алар безнең күңелебезгә ямь өстиләр, илһам бирәләр. Алар бик күп зарарлы бөҗәкләрне юк итеп табигатькә, кешеләргә бик зур файда китерәләр. Шуңа күрә безнең бурычыбыз-  кошларга ярдәм итү, аларны саклау.  Бәйрәм кичәсе  эчтәлекле шигырьләр, җырлар, шаян биюләр, күңелле уеннар  белән үрелеп барды.  Үткәрелгән чарада Татарстан Республикасы Экология һәм табигать ресурслары министрлыгының  төньяк территориаль идарәсе  белгече  Шәймуллина Алия Ринат кызы һәм «Ашыт» дәүләт табигый тыюлыгы  белгече Абдрахманова  Гөлнара Ильяс кызы катнашты.  Кичә  ахырында  алар балаларга  кызыклы  чара   өчен рәхмәт әйтеп, бүләкләр тапшырдылар.

Кошлар- безнең дусларыбыз! Аларны рәнҗетмик, ояларын туздырмыйк. Кошлар өчен кышын  җимлекләр, язын оялар ясап  элик! Алар  үзләренең сайраулары аша безгә  рәхмәтләрен җиткерерләр.