Әлеге атна тарих һәм җәмгыять белеме атналыгы дип игълан ителгән иде. 17 нче гыйнвар көнне, атналык кысаларында, укытучы Гимазов Н.Ф. тарафыннан "Ленинград блокадасы" дип исемләнгән видеосюжет тәкъдим ителде. 19 нчы гыйнвар көнне "Тормыш - көнкүреш: шәһәр һәм авыл тормышында яңа билгеләр" дигән темага 8 нче класста ачык дәрес күрсәтелде.

Мәктәптә укучылар арасында чаңгы ярышы үткәрелде. Һәркем теләп катнашты. Җиңүчеләр билгеләнде, грамоталар тапшырылды.

5 нче январь көнне  районда Кыш Бабай призына үткәрелгән татар-башкорт көрәшендә Ахметов Әмир II, Хәбетдинов Айназ III, Саматов Илназ IV нче урынга ия булдылар. Егетләрне котлыйбыз, молодцы!

Районда Кыш Бабай призына үткәрелгән чаңгы ярышында Шаймарданов Рияз I, ә бадминтон ярышында  III урынга лаек булды. Риязны әлеге җиңүләре белән котлыйбыз, киләчәктә дә уңышлар телибез!

24 нче декабрь көнне мәктәптә Яңа ел бәйрәме үткәрелде. Укучылар Кыш бабай һәм Кар кызы белән берлектә бик матур итеп күңел ачтылар. Уку һәм спорт алдынгыларына, мәктәп тормышында актив булган укучыларга Кыш бабай бик күп бүләкләр алып килгән. Бәйрәм концерт номерлары, матур шигырьләр белән үрелеп барды. Төрле конкурсларга урыннар чыгарылды. Ахырдан лотерея уены оештырылды.

Бүген, ягъни 22 нче декабрь көнне, мәктәптә II чирек йомгаклары буенча ата-аналар җыелышы булды. Җыелышта чирек дәвамында ирешелгән уңышлар, эшләнгән эшләр ата-аналар тарафына җиткерелде. Кышкы каникул вакытында куркынычсызлык кагыйдәләренең үтәлешенә басым ясалды. Алдагы чиреккә максатлар куелды.

17 нче декабрь көнне  авыл хуҗалыгы алдынгылары белән " Барлык һөнәрләр дә яхшы, барлык һөнәрләр дә кирәк" дип исемләнгән очрашу булды. Әлеге чарада хезмәткәрләр укучыларны үзләренең тормыш һәм хезмәт юллары белән таныштырдылар. Укучыларга һөнәр сайлауда үзләренең киңәшләрен бирделәр, белем алуның мөһимлегенә тукталдылар. Чара укучылар тарафыннан әзерләнгән концерт номерлары белән үрелеп барды.

Укучылар бу көннәрдә I яртыеллык өчен район контроль эшләрен эшлиләр. Аларга уңышлар телибез.

10 нчы декабрь көнне районда кышкы сезонны ачу буенча чаңгы ярышы булды. Әлеге ярышта егетләр арасында Шаймарданов Рияз 3 нче, шулай ук  мәктәп командасы да 3 нче урынга лаек булдылар. Чаңгычыларыбызны җиңүләре белән котлыйбыз.

Көтеп алынган Яңа елга санаулы көннәр калып бара. Мәктәптә әлеге бәйрәмгә әзерлек башланып китте.  Укучыларыбыз ярыша-ярыша класс бизиләр, кар сыннары ясыйлар.