Бүген мәктәп укучылары язгы сессия ГТО нормаларын тапшырдылар.

Бүген 9 Май Җиңү көненә карата митинг булып узды.

Бүген 9 нчы сыйныф укучылары татар теленнән Бердәм республика тесты тапшырдылар. Бары  яхшы нәтиҗәләр генә көтеп калабыз!

Бүген Түбән Урысбага авылы мәдәният йортында Г.Тукайның тууына 130 ел тулуга һәм аның Бәчек авылында яшәгән туганнарына багышланган “Тукай безнең йөрәкләрдә” исемле әдәби-музыкаль кичә булып узды. Кичәне мәктәп укытучылары һәм мәдәният йорты хезмәткәрләре   бергә әзерләде.

         Бәйрәмдә Яшел Үзән районы башлыгы урынбасары Хәлилова Лилия Шәүкәт кызы, Тукай фондының Яшел Үзәндәге филиалы җитәкчесе Филиппова Клара Мәрдән кызы, татар халык шагыйре, Г.Тукай исемендәге Дәүләт премиясе лауреаты Мансуров Зиннур Мәҗит улы, Татарстанның атказанган сәнгать эшлеклесе, Язучылар союзы рәисе урынбасары Данил Хәбибрахман улы Салихов, “Казан утлары” журналының бүлек мөхәррире Фәнил Гыйләҗев, күренекле шагыйрә Эльмира Мөхәммәт кызы Шәрифуллина катнашты.

        Кичә ике бүлектән торды. I бүлектә Г.Тукайның шигырь һәм әкиятләреннән әдәби-музыкаль композиция күрсәтелде.

II бүлектә Г.Тукай исемендәге VI Бөтенроссия уку бәйгесенең “Тукай замандашлары” дип исемләнгән муниципаль турында җиңеп чыгучы Норлат, Күгеш, Мулла Иле, Акъегет, Татар Танае мәктәпләреннән килгән укучылар үз шигырьләрен тәкъдим иттеләр. Килгән кунаклар кичәдә шагыйрьләрнең сирәк яңгыраган шигырьләре сөйләнүен бик яраттылар. Соңыннан укучылар Мәгариф идарәсе һәм Яшел Үзән районының татар-милли мәдәни үзәге, Тукай фонды филиалы тарафыннан әзерләнгән диплом һәм “Казан утлары” журналы  белән бүләкләнделәр.

          Кичәдән соң килгән кунаклар Бәчек авылына юл тоттылар. Анда Бәчек башлангыч мәктәбендә Г.Тукайның апасы Өммеһания укыткан кабинеттагы музей-экспозициясе белән таныштылар. Мәктәптә апасының шәле саклана.

          Мәктәптән соң, Бәчек зиратына юл тоттылар. Анда Г.Тукайның туганнары күмелгән каберлеккә дога кылдылар. Яңадан авылга кайтып, Тукайның сөекле апасы яшәгән нигездә дога кылдылар.

Г.Тукайның тууына 130 ел тулуга багышланган әдәби кичә.  Укучылар Г.Тукайның әкиятләрен сәхнәләштерделәр.

Бүген безнең мәктәптә 1 нче апрель - Халыкара кошлар көненә карата бәйге булып узды. Бәйгедә "Карлыгач" һәм "Акчарлак" командалары ярышты. Укучылар кошлар турында төрле кызыклы сорауларга җавап эзләделәр, үз куллары белән ясалган сыерчык ояларын тәкъдим иттеләр.46 балл белән "Карлыгач" командасы җиңеп чыкты.

Бүген Норлат урта мәктәбендә бөек шагыйребез Габдулла Тукайның тууына 130 ел тулуга багышланган VI Бөтенроссия уку бәйгесе булып узды. Әлеге бәйгедә безнең мәктәп укучылары да катнашты. 7 нче сыйныф укучысы Сиразиева Әдилә 2 нче урынга, 8 нче сыйныф укучысы Хәертдинова Алия 3 нче урынга лаек булдылар. Без аларны җиңүләре белән котлыйбыз һәм киләчәктә дә уңышлар телибез!

Бүген Казан шәһәренең  Ф.Аитова исемендәге 12 нче номерлы гимназиясендә Т.Миңнуллин исемендәге III республика конференциясе булып узды. Әлеге конференциядә безнең мәктәпнең китапханәчесе Фәсхетдинова М.Н. катнашты һәм җиңүче дипломына лаек булды. Без аны котлыйбыз!