Бүген Илексаз авылыннан чыгып китеп, сугышта һәлак булган сугышчылар хөрмәтенә куелган обелиск янында митинг булды. Мәктәп коллективы митингка алдан ук әзерлекне башлаган иде. Балалар үзләренең сугышта үлеп калган бабалары фотолары белән бардылар. Бер минутлык тынлык белән искә алганнан соң, венок куелды. Соңыннан Хисаметдинова А.Ә. җитәкчелегендә әзерләнгән укучыларның бәйрәм концерты күрсәтелде. 

Бүген  12 яшькә кадәрге булган укучылар арасында "Хәвефсез тәгәрмәч" ярышы булды. Алар велосипедта фигуралы шуу буенча һәм юл йөрү кагыйдәләре буенча осталыкларын күрсәттеләр. Һәр команда агитбригада чыгышын да әзерләәгән иде. 

Бүген 5, 6, 8 нче сыйныф укучылары арасында "Тукай әсәрләрен беләсеңме?" дигән ярыш үтте. Аны татар теле һәм әдәбияты укытучысы Хәлиуллина Г.Г. үткәрде. Укучылар "Шүрәле" һәм "Су анасы" командаларына бүленеп ярыштылар. Укучылар Тукай турындагы белемнәрен, аның әсәрләрен искә төшерделәр, 1 шигырен сәхнәләштерделәр. Ярыш "Туган тел" җыры белән тәмамланды. Барлык җаваплардан соң, "Шүрәле" командасына өстенлек бирелде.

Бүген 4 нче сыйныф укучылары рус теленнән тест эшләделәр.

Бүген 5-6 нчы сыйныф укучылары татар теле укытучысы Хәлиуллина Г.Г. җитәкчелегендә Илексаз авылы китапханәсенә экскурсиягә менделәр. Китапханәче Закирова Ә. аларга Г.Тукайның тормыш  юлы һәм иҗаты турында сөйләде, яңа китаплар белән таныштырды. Экскурсиядән һәркем канәгать калды. 

24 апрель көнне  “Сарман” кинотеатрында “Сарман мәгълүмат-мөхәррият үзәге” район мәктәпләре, балалар бакчаларының шигырь язучы балалары белән очрашу үткәрде. Ул бөек шагыйребез Габдулла Тукайның туган көненә, Туган тел көненә, Бөек Җиңүнең 70 еллыгына, шулай ук “Язгы игелеклелек атнасы”на багышланды. Очрашуны “Сарман мәгълүмат-мөхәррият үзәге” директоры-баш мөхәррир Альбина Сабирова алып барды.

Бу чарада безнең Илексаз мәктәбе укучылары да актив катнашты. Алар "Сугыш" темасына үзләре язган шигырьләрен сәхнәләштерделәр, презентация күрсәтелде. 

Бүген 4 нче сыйныфлар математикадан тест эшләделәр.

Мәктәбебездә Татар теле атналыгы бара. Укучыларга Тукай әсәрләре буенча рәсемнәр ясарга кушылган иде. Бүген Тукай әсәрләре буенча ясалган рәсем конкурсына йомгак ясалды. 

Бүген чираттагы Батырлык сәгате үтте. Аны тарих укытучысы Хисаметдинова А.Ә. үткәрде. Бу юлы Советлар Союзы Геройлары Мария Васильевна Октябрьская һәм Федор Андрианович Полетаев, Кызыл Йолдыз ордены иясе Әгъләмов Сөббух абый  турында мәгълүмат бирде.

Мария  Октябрьская, сугышта һәлак булган ире өчен үч йөзеннән сугышка китәргә теләк белдерә. Үзенең 50 мең акчасын танк төзүгә тапшыра һәм аның өчен махсус "Боевая подруга" дип исемләнгән танк җитештерәләр. Курку белмәс хатын 1944 елның 17 январена кадәр фашистларны тар-мар итә. Үзе үлгәннән соң  Советлар Союзы Герое исеме бирәләр. 

Федор  Полетаев - Италиянең Милли Герое исеменә лаек булган санаулы кешеләрнең берсе. Ул Италиядә партизаннар хәрәкәтендә катнашкан, күп батырлыклар кылган. 1962 елда аңа Советлар Союзы Герое исеме бирәләр. 

Үзебезнең Сарман районы Илексаз авылы егете Әгъләмов Сөббух абый да әлеге геройларга тиң батырлыклар кылган. Кызганычка каршы, аңа тиешле Кызыл Йолдыз ордены 2015 елның февраль аенда гына үзенең иясен эзләп тапты. Ветеран  бер ел элек вафат булды.

Бүген 4 нче сыйныф укучылары рус теленнән белемнәрен тикшерделәр.