27 май көнне башлангыч сыйныфлар табигатькә сәяхәткә чыктылар. Һәр яз саен табигатькә чыгу яхшы традициягә әйләнде. Авылның матур урыннары белән танышу, уйнау һәм ял итәр өчен менә дигән мөмкинлек. Мәктәп күләмендәге поход эстафетадан башка үтмәде.Укучылар вакытны бик күңелле үткәрделәр: сукмаклар буйлап йөгерделәр, хәрәкәтле уеннар уйнадылар, бер-берсе белән аралаштылар. Уеннар-җырлар белән вакытның үткәне дә сизелмәде. Бүгенге сәяхәт- иң  күңеллесе булды!  

Бөтенроссия фән олимпиадаларының республика һәм район этабында призлы урыннар яулаган укучыларыбызны, аларның әти-әниләрен котлау!!!

Кайчан гына әле күбәләктәй

Ашкынып килдегез мәктәпкә.

Җиз кыңгырау дәште сезне һәркөн

Яңалыклар тулы дәрескә.

Үтте бик күп айлар, үтте еллар.

Күз алдында үсеп җиттегез.

Белем үрләренә омтылдыгыз,

Бәйгеләрдә бик еш җиңдегез.

Мәктәптә сез канат ныгыттыгыз,

Хәзер инде очып китәсез.

Шатлык, куаныч, изге күңел белән

Каршылагыз һәркөн иртәсен.

Ышанабыз сезгә: мәңге кызартмассыз,

Безнең йөзне, туган ил йөзен.

Онытмагыз, һәрчак көтә сезне

Әти-әниләрегезнең нигезе.

Инде менә бүген кошлар кебек,

Иркен киңлекләргә очасыз.

Хәерле юл сезгә! Изге теләк белән

Сезне инде озатып калабыз.

21 нче май көнне 11 нче сыйныф укучысы, Фәйзетдинова Алинә,  "Культура и наука: новый взгляд" исемле Халыкара фәнни-практик конференциядә катнашып 3 нче урынга лаек булды. Алинәне һәм аның җитәкчесе Фальванова Айгөл Фидаилевнаны зур уңышлары белән котлыйбыз!!!

20 нче май көнне район мәдәният йортында фән олимпиадаларында җиңүчеләрне һәм "Ел укытучысы - 2019" бәйгесе җиңүчеләрен тәбрикләү тантанасы үтте. Әлеге тантанада безнең мәктәп укытучылары, Миңсылу Фәнәвиевна, Олеся Леонидовна, Гөлфинә Ренатовна, Ландыш Әгъләмҗәновна, тәбрикләнде!

11 нче март көнне "Иң матур язучы һәм пөхтә дәфтәр" конкурсына нәтиҗә ясалды. Һәрбер сыйныфтан бер җиңүче билгеләнде. Җиңүчеләрне укыту эшләре буенча директор урынбасары Фәйзетдинова Зилә Бәшир кызы грамота белән бүләкләп үтте. Җиңүчеләребез: Аухадиева Н.В. (1 нче "А" сыйныфы), Хаҗиева З.Д. (1 нче "Б" сыйныфы), Хантимирова А.А. (2 нче сыйныф), Ганиев Н.Н. (3 нче сыйныф), Сафина А.А. (4 нче "А" сыйныфы), Хаҗиева Д.А. (4 нче "Б" сыйныфы), Хантимиров Г.А. (5 нче сыйныф), Вәлиева К.А. (6 нчы сыйныф), Хаҗиева А.А. (7 нче сыйныф), Гараева Р.И. (8 нче сыйныф), Хисамутдинова Э.Д. (9 нчы сыйныф), Исхакова И.И. (10 нчы сыйныф), Хаҗиева Г.А. (10 нчы сыйныф), Галимҗанова Э.Р. (11 нче сыйныф). Барлык җиңүчеләрне дә котлыйбыз!

6 нчы март көнне безнең мәктәптә "Әлифба бәйрәме" үткәрелде. 1 нче сыйныф укучылары белем дөньясындагы беренче җиңүләрен бәйрәм иттеләр. Бәйрәмдә балаларның әти-әниләре, дәү әниләре катнашты. Укучылар бәйрәмдә җырладылар, биеделәр, шигырьләр сөйләделәр. Бәйрәм бик күңелле үтте. Мәктәп директоры Галимов Илфат Рафинад улы һәм укыту эшләре буенча директор урынбасары Фәйзетдинова Зилә Бәшир кызы 1 нче сыйныф укучыларын "Әлифба бәйрәме" белән котлап, истәлекле бүләкләр тапшырдылар. Әлеге бәйрәмне оештырган 1 нче "А" , 1 нче "Б" сыйныфы  җитәкчеләре Марсилә Миннахмет кызы һәм Гамилә Әсхәт кызына олы рәхмәтебезне белдерәбез!