Кыш җиттеме, кошлар өчен
Без ашханә ачабыз.
Һәм кошларга эндәшәбез:
– Рәхим итеп ашагыз!

Балаларның кошлар турында белемнәрен системалаштыру, камилләштерү, кышлаучы кошлар белән таныштыру, аларга карата кайгыртучанлык хисләре тәрбияләү максатыннан, бакчабызда әлеге атна  "Кышлаучы кошлар" темасы астында үтте. Атна дәвамында кошлар турында табышмакларга җаваплар табылды, тема буенча стенд ясалып, кошлар турында мәгълүматлар бирелде, шигырьләр укылды. Йомгаклау чарасы буларак, балалар әтиләре белән бергәләп кошларга җимлекләр ясап алып килделәр. Хәзер без кошларыбызны кыш көне әлеге кошлар ашханәсендә тукландырып торачакбыз.

Авылыбыз китапханәсендә 21нче ноябрь көнне,  “Гаилә елы”н йомгаклап,  әти- әниләр, балалар белән   “Безнең гаилә” дип исемләнгән кичә үткәрелде. Балаларыбыз әти-әниләргә  матур  җыр-биюләрен, шигырь-теләкләрен бүләк иттеләр.  Бәйрәмдә балаларның чыгышлары белән беррәттән, әти-әниләр дә үзләренең  җырлары белән бәйрәмне тагын да бизәделәр. Үзләрнең бала чакларын искә төшереп, “Кечкенә үрдәкләр биюе”, “Летка-енка”биюләрен башкардылар. Авылыбызга, бакчага  багышланган сорауларга җаваплар эзләделәр, кроссворд чиштеләр. Бакчабыз хезмәткәрләре башкаруында кашыклар белән бию бәйрәмгә ямь өстәде. Кичә бик күңелле узды.

Узган атна бакчабызда “ Җир шары буенча сәяхәт”. темасы астында үтте. Максаты: җир шары безнең уртак йортыбыз булуын,анда төрле культуралы, төрле милләт кешеләре яшәвен аңлату, аларга карата хөрмәт тәрбияләү иде. Атнаны йомгаклау чарасы итеп "Джунгли чакыра" дип исемләнгән спорт - күңел ачу чарасы уздырылды.

28нче октябрь - 2нче ноябрь көннәре бакчабызда "Россия-зур дәүләт.Мәскәу-башкала" дигән тема астында үтте. Йомгаклау чарасы буларак, балаларның үзебезнең илебез, аның символлары, табигате, халыклары, бәйрәмнәре турында алган белемнәрен тагын да тулыландыру максатыннан, авылыбыз китапханәсендә "Минем Ватаным - Россия" дип исемләнгән уен-викторина уздырылды.

Бакчабызда узган атна темасы " Ясалма һәм табигый сулыклар" иде. Балалар белән сулыкларның кешегә һәм табигатькә кирәклеген, файдасын өйрәндек. Бергәләп авылыбыз күленә экскурсиягә төштек, сулыклар янында үз-үзеңне тоту кагыйдәләрен искә төшердек. Балаларга экскурсия ошады.

18 октябрь көнне бакчабызда "Алтын көз" бәйрәме үткәрелде. Бәйрәмчә бизәлгән залда балалар көз, уңыш темасына карата уеннар уйнадылар, җырладылар, Көз кызы алып килгән биремнәрне үтәделәр.Ә әти-әниләребез бик матур эшләнмәләр ясап алып килде. Бу истә калырлык, шатлыклы һәм якты бәйрәм балаларга көз турында ел фасылы буларак күзаллауларын ныгытырга ярдәм итә.

Иң яхшы тәрбия - хезмәт тәрбиясе. Шуны күздә тотып, без дә балалар белән бакчабызда бергәләп матур чәчәкләр, яшелчәләр үстерәбез. Кишер, чөгендер уңышын да бергә җыеп алдык.

Челтер- челтер чишмә ага
Һич тә тыймалы түгел.
Ә сулары шундый йомшак
Эчеп туймалы түгел.

Без барабыз чишмәбезнең
Салкын суын эчәргә.
Эчкәндә үзеннән-үзе
Баш иелә чишмәгә.
Бүген без дә, бакчабызга йөрүче балаларга чишмәләрнең табигый байлык икәнлеген, изге җир булуын төшендерү максатыннан, авылыбызың Әсхәт чишмәсенә экскурсиягә бардык.

Бүген  Иләбәр авыл клубында әти-әниләр комитетлары арасында уздырыла торган "Тату бакча серләре" район бәйгесенең зона этабы узды. Әлеге бәйгедә безнең балалар бакчасының әти-әниләләре дә актив катнашып, бик матур чыгыш ясадылар, дус булып яшәүнең серләрен ачтылар һәм "Иң иҗади әти-әниләр комитеты" номинациясендә җиңүче булдылар. Әти-әниләребезгә һәм балаларыбызга коллектив исеменнән зур рәхмәтләребезне җиткерәбез!