Бүген мәктәбебезнең II һәм IV сыйныф укучылары белән "Яхшылык кылырга ашыгыйк!" дигән җыен уздырылды. Укучылар кызыклы презентация карадылар, күркәм сыйфатлар турында фикер алыштылар. Җыен азагында, Бөек Җиңүнең 70 еллыгы уңаеннан, сугыш ветераны Загидуллин Габделфәрт бабайга котлау открыткасы ясадылар. 

            Бүген мәктәбебезнең 4 нче сыйныф укучылары (сыйныф җитәкчеләре - Набиуллина Г.М.) проект эше эшләделәр. Әлеге эшчәнлек барышында укучылар коллективта эшләргә, үзенә бирелгән эшкә җаваплы карарга, куелган сорауларга җавап табарга өйрәнделәр. 4 нче сыйныф укучылары төзегән спорт мәйданчыгы макеты матур һәм зәвыклы булды.

 Космонавтика көне уңаеннан “Кеше галәмдә”, “Космосның тормыштагы роле”, “Россия – бөек космик держава “ дигән темаларга класс сәгатьләре үткәрелде. Видеоролик карап фикер алыштылар.  Хәзер  космик техника ярдәмендә кесә телефоны аша теләсә - кайчан рәхәтләнеп сөйләшә алабыз, ерак илләрдәге вакыйгаларны телевизор экраннары аша карыйбыз, һава торышының кайда нинди икәнен һәм ничегрәк үзгәрүен күрәбез.  Ул гына да түгел әле. Космостан Җир эчендәге казылма байлыкларны тизрәк ачыклап була икән. Хәтта авыл хуҗалыгы культураларының агымдагы җәйдә нинди  уңыш бирәчәген дә космостан билгеләү мөмкин икәнлеге турында сөйләштеләр. 

    Мәктәбебездә космонавтика көненә карата рәсем бәйгесе уздырылыды. Әлеге бәйгедә башлангыч сыйныф укучылары аеруча актив катнаштылар. Бәйге азагында китапханәдә әлеге рәсемнәрдән күргәзмә оештырылды.

  10 апрель көнне Саба гимназиясе базасында XIX Республика  "Яшь программист" конкурсының муниципаль этабы оештырылды.Мәктәбебезнең 7 класс укучысы Нургалиев Нияз (җитәкчесе Нургалиев Р.Н.)  "Web сайт" номинациясендә 3 урын алды.

Укучыбызга алга таба да уңышлар телибез.

              Бүген мәктәбебездә Бөек Җиңүнең 70 еллыгына багышланган "Җиңү кайтавазы мәңгелек!" дип аталган җыр һәм шигырь конкурсы үтте. 1-8 нче сыйныф укучылары сугыш чоры җырларын җырладылар, дәһшәтле елларны, җиңү шатлыгын чагылдырган шигырьләр сөйләделәр. Әлеге чара укучыларда ватанпәрвәрлек хисен тәрбияләүдә зур этәргеч булды. 

        Мәктәбебездә Бөек Җиңүнең 70 еллыгына багышланган чаралар даими оештырылып килә. Укучыларыбыз әлеге истәлекле датага багышлап стена газетасы чыгардылар. Биредә сугыш афәтен чагылдырган мәкаләләр, шигырьләр, укучыларыбызның бабалары турында истәлекләре урын алган.

           8 нче сыйныфта "Без зарарлы гадәтләргә каршы" дигән сыйныф сәгате узды. Укучылар бик күп файдалы мәгълүмат алдылар, сәламәт яшәү рәвешен пропагандалауга юнәлтелгән викторина сорауларына җавап бирделәр. 

        Мәктәп күләмендә   каен һәм  нарат бөреләре җыю буенча ункөнлек  игълан ителгән иде. Әлеге чарада һәр укучы актив катнашты. Нәтиҗәдә 0,250 г. каен, 2.500 г. нарат бөресе җыеп тапшырылды.

  Бөтендөнья сәламәтлек көне уңаеннан 1 класс укытучысы Якупова Р.С. "Сәламәтлек - зур байлык" темасына класс сәгате үткәрде. Укучылар презентация буенча сәяхәт иттеләр, "Ярый, ярамый",  "Мин, мин һәм минем дусларым" һ.б. уеннар уйнадылар.