19 май көнне мәктәбебездә “Кызыл галстуклы балачак” дип исемләнгән чара узды. Әлеге чара Пионериянең 100 еллыгына багышланды. Мәктәпнең кунаклары- төрле елларда пионервожатый, педагог – оештыручы булып эшләгән Рузалия Зыятдиновна, Кадрия Шаһимәрдановна, Земфира Шамиловна, Рәмзия Накиповналар иде. Алар укучыларга пионер оешмалары, аларның тарихы, эшчәнлеге, атрибутлары турында сөйләделәр. Үзләренең хезмәт еллары турында искә төшерделәр, укучыларга матур киңәшләрен җиткерделәр. Шулай ук укучыларга мәктәбебезнең пионер оешмасын чагылдырган күргәзмә тәкъдим ителде. Әлеге күргәзмәдә Мария Мельникайте исемендәге дружина, аның составындагы отрядлар тарафыннан төрле елларда эшләнгән көндәлекләр, еллык отчетлар урнаштырылды. Ветеран пионервожатыйлар күргәзмәдәге көндәлекләр буенча үзләренең яшьлек елларын искә алдылар. Укучыларга пионерларның нинди актив булуларын, макулатура, сөяк, көл, чүпрәк җыеп, җәмгыятькә файдалы хезмәттә катнашулары турында сөйләделәр. Эзтабарлар һәм варислар пионерлар хәрәкәтенең матур традицияләрен дәвам итәргә сүз бирделәр.