Безнең илебездә Әниләр көне 1998 елдан бирле билгеләп үтелә. Бу көнне әниләрне хөрмәтләү, аларны зурлау, гаиләдәге урынын олылау буенча күп төрле чаралар үткәрелә. Быел да Балык Бистәсе районы Мәдәният йортында 25 ноябрь көнне әлеге бәйрәмне лаеклы каршылауга багышланган олы чара үтте. Чарага чакырылучылар арасында “Татарстан Республикасының хатын-кыз исемнәре: тарих һәм хәзерге заман” региональ мәгълүмати проекты катнашучысы буларак Татарстан Республикасының Атказанган укытучысы, бөтен гомерен балаларга химия һәм биология фәне серләрен аңлатуга багышлаган Яңа Арыш урта мәктәбеннән Нәбиуллина Галия Гыймран кызы да бар иде. Мәдәният йортының фойесында проектта катнашучыларның тормыш юлын, җәмгыятьтә ирешкән уңышларын чагылдырган Россия, Татарстан дәрәҗәсендәге күп төрле Мактау грамоталары, Рәхмәт хатлары урын алган. Күргәзмә белән танышып, Балык Бистәсе муниципаль районы Башлыгының беренче урынбасары Әхмәтҗанова Фирдания Гомәр кызы, аларга олы рәхмәтен җиткерде, алдагы тормышларында саулык-сәламәтлек, уңышлар, гаилә бәхете теләде. Соңыннан Мәдәният йорты залын тутырып утырган хатын-кызларга чәчәкләр өләшенде, бәйрәм чарасы күңелле концерт белән дәвам итте.