Кышкы каникул чорында ата-аналар балаларның ялларын күңеллерәк итү өчен бар көчләрен куйды. Авылыбыздан күп гаиләләр район үзәгендә оештырылган бәйрәм чараларын тамаша кылды. Ә балалар өчен иң кызыгы- боз тауларыннан шуу! Үзәк мәйдандагы чыршы янын бизәгән  боз таулары каникул чорында шомарып, үз яннарына көннән-көн күбрәк бала җыя алуларына куанычтан балкыдылар. Балалар көлүе, шатлыклы авазлар , бәйрәм котлаулары әле бүген дә дәвам итә.

Мәктәбебез укытучылары районыбыз күләмендә пәйгамбәребез Мөхәммәт (с.г.в) хөрмәтенә уздырылган Мәүлид ән-Нәби кичәсендә катнашты. 

Кунак ашы-кара-каршы, ди татар халык мәкале. Бүген исә хоккей сөючеләр Киекле мәктәбе шугалагында көч сынашты. Үз өеңдә стеналар да булыша дигән әйтем дөрестер, мөгаен, уен хуҗалар файдасына тәмамланды.  Егетләрнең алда торган зур хоккей ярышларына әзерлекләре менә шулай дәвам итә. Аларга чын егетләр уенында уңышлар, рух ныклыгы, максатчанлык һәм уңай һава торышы телибез. Укучыларны ярышларга әзерләгән тренерларга әти-әниләр һәм мәктәп җитәкчелеге исеменнән рәхмәт белдерәбез.

Каникул дәвамында 5-9 нчы сыйныф укучылары сыйныф җитәкчеләре белән чаңгыларга басты. Чаңгылы сәяхәтләр басу-кырлар, калкулыклар, гомумән, туган як табигате белән танышу, кышкы күренешләргә соклану, сәламәтлекне ныгыту өчен бер дигән чара.

Бүген мәктәбебездән бер төркем укытучылар һәм укучылар  Нурлат шәһәрендә Хәтер маршы "тукталышында" булды. Очрашуда казан шәһәренең 101 нче мәктәбе укучыларыннан торган эзләнү отряды, районыбызның "Легион" эзләнү отряды һәм Бөек Ватан сугышы мемориал музее директоры М.В. Черепанов катнашты. Әлеге тәэсирле чара күңелләрне нечкәртте, сугыш афәтенең кайтавазлары булып, сугыш чорында районыбызда хәбәрсез югалган дип исәпләнеп, бүгенге көндә эзләнү отрядларының тырыш хезмәте нәтиҗәсендә табылган райондашларыбызның сугыш кырларында вафат булуын раслаган документлар сугышчыларның балаларына, туганнарына тапшырылды.  

Бүген мәктәп яны шугалагында Кизләү һәм Киекле авылы мәктәп командаларының хоккей буенча иптәшләрчә уены уздырылды.Уенны карарга әти-әниләр, мәктәп дуслары да килгән иде. Яңа ел ялларын күңелле һәм файдалы итеп уздыру өчен кышкы спорт төрләре- менә дигән мөмкинлек! Уен  шугалак хуҗалары файдасына   тәмамланды. Афәрин, егетләр, булдырасыз!

Каникул чоры - мәктәптә балаларның аеруча шатлыклы авазлары яңгырый торган чор. Уен-көлке, шаян сүз, ярыш, узышлар һәркем күңеленә хуш килә.  Мәктәп шугалагы - бөтен вакыйгаларның үзәге. Бүген исә шугалак мәйданын 1-5 нче сыйныф укучылары биләде. Алар өчен сыйныф җитәкчеләре шугалакта күңелле стартлар уздырды. 

Яңа елның беренче көне башлангыч һәм урта звено укучыларының күңелле очрашулары, хәрәкәтле уеннар белән узды. Яңа елыбыз күңелле вакыйгаларга бай булсын!

Республикакүләм "Киләчәккә билет" конкурсы җиңүчеләре арасында мәктәбебез укучысы  Колмөхәммәтов З. тә бар. Ул "Киләчәк һөнәре" номинациясендә 2 нче урынга лаек булды. Афәрин!

Бүген чыгарылыш сыйныф укучыларыбыз рус теленнән ДЙА форматында сынау  тапшырды. Аларның эш нәтиҗәләренең уңышлы булуын телибез.