Туган телләр һәм халыклар бердәмлеге елы уңаеннан,  11 нче февраль көнне “Аулак өй” муниципаль проектының чираттагы утырышы Тойгелде төп гомуми белем бирү мәктәбендә узды. ”Аулак өй” нең темасы -  «Хатын-кызның күрке – яулык» . Чарада 41 кеше катнашты.  Ул хатын-кызларыбызның милли баш киеме – яулык, шәлләр турында булды. Зал күзнең явын алырдай аллы-гөлле бизәкле яулык, шәлъяулык, шәлләр белән бизәлде. Оештырылган чарада авылыбызның китапханәчесе Нурия Бахтегараева катнашты.  Ул хатын-кызларның күркәмлеге, тормыштагы алыштыргысыз роле, әниләрнең бөеклеге турында сөйләде. Туган телебез – татар телен, халкыбызның милли йолаларын, гореф-гадәтләрен балаларга, оныкларга җиткерү, өйрәтеп калдыру да хатын - кызның изге вазыйфасы, бурычы дип атады. Чара азагында яулык бәйләү буенча мастер - класс үткәрелде. Айсылу Минабудтинова төрле яулык, палантинны матур итеп чөеп куярга, бәйләргә өйрәтте. Чара бик җылы шартларда узды.

Туган телләр һәм халыклар бердәмлеге елы кысаларында мәктәбебездә 9 нчы февраль  көнне күренекле язучы, шагыйрь, прозаик, публицист, җәлилче-галим, мөгаллим, җырлар авторы, Татарстан Республикасының Муса Җәлил исемендәге премиясе лауреаты, Татарстанның атказанган мәдәният хезмәткәре Хәнәфи Бәдигыйның “Муса Җәлил поэтикасы” дигән китабын тәкъдир итүгә багышланган әдәби-музыкаль кичә булды. Кичәдә 22 кеше катнашты. Хәнәфи Бәдигый  әсәрендә,  шагыйрьнең әдәби әсәрләренең, сәнгати, идея-эстетик, лингвостилистик үзенчәлекләре һәм аларның татар поэзиясен, сәнгатен үстерүдәге әһәмиятен тикшерү-өйрәнүгә багышлаган.

10 нчы февраль көнне 8 нче сыйныф укучысы Мингазова Диләрә "Искиткеч әйдәман" дип исемләнгән конкурсның муниципаль турында катнашып - "Иң креатив" номинациясендә җиңү яулады.

Мәктәбебез тәрбиячесе Насифуллина И.М. районда узган "Театральное лукошко" бәйгесендә катнашып - 1 нче урынга лаек булды. 

Укучыларның туклануын контрольдә тоту рамкасында әти-әниләр мәктәп ашханәсенә килеп, ризыкларны тикшереп карый алалар. 

Әле кайчан гына мәктәптә белем алып йөргән укучыларыбыз - хәзер төрле уку йортларында төпле һөнәр үзләштерүче студентлар. 6 нчы февраль кичендә без аларны традиция буенча мәктәпкә "Студентлар очрашуы кичәсе"нә кунакка чакырдык. Килгән кунакларыбыз үзләренең студент тормышына бәйле вакыйгалары белән уртаклаштылар, уку йортлары турында әңгәмә оештырдылар, укучыларның һәм укытучыларның сорауларына җавап бирделәр . 

5 нче февраль көнне мәктәбебездә Туган телләр һәм халыклар бердәмлеге елы уңаеннан - "Форпост" җитәкчесе Сабиров Ильнур Ильшатович һәм  "Боец" хәрби-патриотик клубының җитәкчесе Иванов Альберт Викторович "Ватанны ярату. Патриотизм безнең йөрәкләрдә" дигән темага тәрбия сәгате уткәрделәр. Тәрбия сәгатендә алар узләренең тормыш юллары, уңышлары, патриот кем ул һәм ул нинди булырга тиеш булу турында сөйләделәр. 

Кышкы каникулларда үткән "Күңелле Кар бабай" акциясендә катнашкан укучыларыбыз сертификатлар белән бүләкләнделәр.