16 майда Иске Шөгер авылы Мәдәният йортында шагыйрь Таһир Шәмсуаровның иҗатына багышланган әдәби бәйге үткәрелде. Районыбыз мәктәпләрендә белем алучы әдәбият сөючеләр ,шигырь укучылар бәйгесен В.П.Чкалов исемендәге Шөгер урта мәктәбенең икенче сыйныф укучылары ачып җибәрде. Алар укытучы-шагыйрь Таһир Шәмсуаровка багышланган җылы хисләрен, изге теләкләрен шигъри сәламләү аша җиткерделәр.Нәниләрнең чыгышыннан соң кайнар алкышлар астында сәхнәгә күренекле шагыйрь Таһир Шәмсуаров күтәрелде.Ул бәйгегә килүчеләрне сәламләп, аларга уңышлар теләде, үзенең яңа шигырьләрен сөйләп, күңелләргә яңа дәрт, илһам өстәде.Шагыйрь төбәгебездә иҗат белән, әдәбият-сәнгать белән кызыксынучылар арасында мәктәп укучыларының аеруча күп булуына шатлануын белдерде һәм бу районыбызның татар теле һәм әдәбияты укытучыларының тырыш хезмәте нәтиҗәсе дип билгеләп үтте. Гомумән, Мәдәният елында районыбыз мәктәпләрендә чын мәгънәсендә матурлык дөньясы белән очрашу, укучыларның рухи байлыкларын арттыру, эстетик зәвыкларын тәрбияләү юнәлешендә бик күп чаралар үткәрелә.