Туган телгә мәхәббәт тәрбияләү, телебезне зурлау, хөрмәтләү, саклау максатыннан, Халыкара туган тел көне уңаеннан, 20 нче февраль көнне В.П.Чкалов исемендәге Шөгер мәктәбендә  “Дөньяда иң-иң матур тел, ул минем туган телем”, дип аталган әдәби-музыкаль кичә узды.

21 февральдә дөньякүләм туган тел көне билгеләп үтелә. ЮНЕСКО тарафыннан игълан ителгән әлеге халыкара бәйрәм дөньядагы телләрне саклау, аларны киләчәк буынга исән-имин җиткерү макстатыннан оешты. Бүгенге көндә галимнәр җир шарында 7 меңнән артык тел булуын әйтәләр. Татар теле – ЮНЕСКО тарафыннан бөтендөнья халыкара аралашу теле дип саналган 14 телнең берсе.

 Һәр халыкның теле үзенчәлекле, күп телләр белү дөньяга карашны киңәйтә, төрле милләт халкының мәдәниятен тирәнрәк белергә ярдәм итә. Ләкин туган тел ул бер генә. Шуңа күрә һәр кеше үз теленә хөрмәт белән карарга тиеш.

              Кичәне милли белем һәм тәрбия буенча директор урынбасары Хәйрова Р.Н. башлап җибәрде. 2 һәм 3 нче сыйныф укучылары туган тел турында шигырьләр сөйләделәр. Балалар китапханәчесе Заһретдинова  С.В. Халыкара туган тел көне һәм аның әһәмияте турында таныштырды. Укучылар игътибарына Г. Тукайның  «Кәҗә белән сарык” әкияте тәкъдим ителде.  

Газизҗанова Р.И. җитәкчелегендә мәктәптән тыш эшләр үзәгендә оештырылган тере куллы курчак театры артистлары “Шалкан”  рус халык әкияте буенча театральләшкән тамаша күрсәттеләр.

              Әдәби-музыкаль кичә  Г.Тукайның “Туган тел” җыры белән тәмамланды.