26 нчы апрель  көнне В.П.Чкалов исемендәге Шөгер урта мәктәбендә туган (татар) теле атналыгы  кысаларында  Г Тукайга 136 ел тулу уңаеннан  5-11 сыйныфлар арасында“Тукай-квест” исеме астында QR-кодланган мавыктыргыч викторина уздырылды. Әлеге викторинада 1 урынга 8А сыйныфы, 2 урынга 6Б, 3 урынга 11, 6А, 7А, 7Б, 7В, 5А, 10Б сыйныфлары лаек булды.

      Викторинаның максаты: Г.Тукайның биографиясен искә төшерү, әсәрләренә күзәтү ясау; шагыйрь иҗатына кызыксыну уяту; шигырьләренә, әкиятләренә нигезләнеп Г. Тукай шәхесенә, әдәби мирасына мәхәббәт тәрбияләү; милли үзаң, үз халкың белән горурлану хисләре тәрбияләү.

       26 нчы апрель- бөек шагыйребез Габдулла Тукайның тууына 136 ел. Габдулла Тукай татар әдәбияты тарихына бөек шагыйрь, әдәби тәнкыйтьче, публицист, яңа татар әдәбиятына нигез салучыларның берсе буларак кереп кала. Ул ватан һәм дөнья мәдәниятенә зур өлеш керткән.
Апрельне Тукай ае дип атыйлар. Чөнки ул апрель аенда туган һәм шул ук айда вафат булган. Ул нибары 27 ел гына яшәгән, әмма бик зур иҗади мирас калдырган. 10 меңнән артык шигырь юлы: 400 дән артык шигырь һәм 9 поэма, шулай ук 350 хикәя, очерк һәм истәлекләр. Тукай хезмәтләре дөньяның 50дән артык теленә тәрҗемә ителгән. Бүген дә аның әсәрләре рус һәм башка милли телләрендә зур тираж белән нәшер ителә.Кыска, әмма рухландыручы иҗади ут белән тулы итеп шагыйрьнең тормышы татар халкы, бөек Россия һәм төрки дөнья тарихының киң күгендә якты, омтылучан, күп гасырлык милли мәдәниятебезне яктыртып барды.