12 апрельдә илебез космонавтика көнен билгеләп үтә. Бу истәлекле дата уңаеннан, бүген китапханәче Драндрова И.белән берлектә «Космосның гаҗәеп дөньясы»исемле кичэ уздырдык. Балалар зур кызыксыну белән Космоска юл тоткан беренче кеше — Юрий Гагарин, кешегә кадәр космоска барып җиткән Белка һәм Стрелка этләре турында хикәяләр тыңладылар, космонавтика үсеше башлангычында торган галимнәр, Кояш системасы планеталары, космоска очу турында күп кызыклы мәгълүмат алдылар. Зур рәхәтлек белән геометрик фигуралардан ракета җыйдылар, оригами техникасында кәгазьдән ракета ясадылар.

   "Өй салу кош оясы ясаудан башлана", ди халык. Элек - электән кешеләр балаларында кошларга сакчыл караш һәм мәхәббәт тәрбияләгәннәр, алар өчен  оялар, җимлекләр ясаганнар. 1 апрель-"Халыкара кошлар көне" көнне без дә китапханәче белән кошлар  көненә багышланган " Язны котлап сайрый  кошлар" дип исемләнгән кичә үткәрдек.Бүлмәбез кошлар рәсемнәре, кошлар турындагы мәкальләр, китап  күргәзмәсе белән җиһазландырылды.Кошларның сайравын тыңлау өчен видео язма куелды.  Экология  темасына карата төзелгән презентация карап үтелде. Балалар кошлар турында табышмаклар әйттеләр, шигырьләр  укыдылар, җырлар җырладылар. Канатлы дусларыбызның файда китерүләре, аларга җимлекләр, оялар ясарга кирәклеге турында сөйләнде.
 

Яз җитүгә, һава торышы үзгәрү белән бәйле булган бәхетсезлек очраклары аеруча арта. Сулыклар янында куркынычсызлык кагыйдәләрен үтәмәү кеше тормышында зур бәхетсезлекләр китереп чыгарырга мөмкин. Балалар белән бәхетсезлек очраклары булдырмау йөзеннән  балаларга су буйларына төшмәскә, бозның бик калын булуына ышанып, боз өстенә кермәскә кирәклеге турында төшендерү мөһим. Яз көне бозның ныклыгы кими, ул кояш җылысында йомшара, шуңа күрә боз өстенә керү тыела.  Язгы чорда елга буйларында үзләре генә йөрмәскә, әти-әниләренең рөхсәтеннән башка өйдән чыгып китмәскә кирәклеге турында да  аңлатырга кирәк.

Кышкы уеннар балаларда иҗади активлык,үзара ярдәмләшү,бердәмлек,дуслык хисләре тәрбияли.Бу уеннар балаларның кәефләрен күтәрә,физик активлыкларын формалаштыра.

Бүген  балалар бакчасында герой-шагыйрь Муса Җәлилнең туган көненә багышланган кичә узды. Кичә барышында балалар Муса Җәлилнең балачагы белән таныштылар. Аның балалар өчен язылган шигырьләрен сәхнәләштерделәр.

Бүген бакчабыз хезмәткәрләре һәм башлангыч мәктәп укытучылары белән көзге өмә оештырдык. Җыелган уңышларны базга төшердек, уен мәйданчыгыннан  көзге яфракларны, кипкән үләннәрне чистарттык.

Безнең балалар бакчасына йөрүчеләр комлыкта уйнарга бик яраталар. Комлыкта уенчыклар белән төрле корылмалар, шәhәрчекләр төзиләр.

Яз җитү белән мәктәп яны һәм балалар бакчасы участогында эш кайный башлый.Укытучылар һәм бакча хезмәткәрләре җирне эшкәртәләр, түтәлләр  ясыйлар. Яшелчәләр, чәчәкләр утырталар.Барыбыз да бик тырышып эшләдек. Җәй һәм көз көннәрендә безнең яшелчә һәм чәчәк бакчасы бик матур булсын иде.

Баланың телен ачуда, сөйләмен үстерүдә бармак уеннары бик зур роль уйный. Бармак күнегүләре һәм бармаклар белән ритмик хәрәкәтләр ясау баш миенең сөйләм өчен җавап бирүче өлкәсенең ярсынуына һәм сөйләм зоналары эшчәнлеге көчәюгә китерә. Нәтиҗәдә сөйләм үсешенә уңай йогынты ясый. Нәниләребез бу уеннарда бик теләп, яратып катнашалар. Үз исемнәрен кушып уйнаган бармак уеннары алар өчен бигрәк тә кызыклы.