7а сыйныфында югары категорияле татар теле һәм әдәбияты укытучысы Арсланова Зөлфия Җәмил кызы “Туган ягым – яшел бишек” темасына чисталык дәресе үткәрде.. Укучылар безне чолгап алган тирәлек, табигать турында өстәмә мәгълүмат алдылар, үзләренең туган як табигатен ничек саклауларын сөйләделәр, табигатьне саклау белән бәйләнешле проблемалар турында фикер алыштылар,кешеләрнең табигатькә мөнәсәбәтен чагылдырган шигырьләр укыдылар. Дәрес туган авылыбыз табигате тасвирланган фотосурәтләрдән торган  презентация белән үрелеп барды. Дәрес ахырында укучылар: “Һәр кеше – табигать баласы, шуңа күрә һәркем табигатьне сакларга, якларга тиеш!” – дигән бердәм фикергә килделәр.

     Чисталык дәресләрен үткәрүдә ТР  экология һәм табигый ресурслар министрлыгының  беренче категорияле белгече Курамшин Ленар Зөфәр улы һәм икенче разрядлы өлкән белгеч Садыйков Рамил Тәүфик улы катнашты.  Алар Бөтендөнья тыюлыклары һәм милли парклары көне белән бәйле рәвештә Татарстандагы, шул исәптән Чүпрәле районында урнашкан тыюлыклар турында сөйләделәр, видеофильм күрсәттеләр, “Милли паркта кыш” темасына викторина үткәрделәр.

     Укучыларга килгән кунакларның чыгышлары, үткәрелгән дәресләр, күрсәтелгән презентацияләр бик ошады. Мондый чаралар ешрак үткәрелсә иде дигән теләктә калабыз.