25 майда мәктәпләрдә соңгы кыңгырау яңгырады. Күңелләрдә гомерлеккә уелып калачак шатлыклы да, моңсу да булган бу тантаналы бәйрәмдә иңнәрендә очар канат тойган чыгарылыш сыйныф укучылары мәктәп, укытучылар коллективы белән саубуллаша. Без, нәниләр дә бу тантаныда катнаштык. Соңгы кыңгырау бәйрәме котлы булсын! Сынауларда тел ачкычы, тапкырлык, зиһенлелек, тәүфыйк юлдаш булып, киләчәктә туплаган гыйлемнәренең файдасын күреп, иминлектә яшәргә язсын.

  Балалар бакчасында  тәрбияләнүче балаларны  юлларда үзеңне имин тоту нигезләренә өйрәтүне мөһим дип саныйлар. Занятиеләрдә нәниләр юл әлифбасын өйрәнәләр. Юл билгеләре белән танышалар. Юл кагыйдәләрен өйрәнү алдан әзерләнгән программа буенча алып барыла.

Һәр елдагыча  9 май - Җиңү бәйрәме зур әзерлек һәм оешканлык белән узды. Мәктәп укучылары демонстрациягә чыктылар, ветераннарны котладылар, алар хөрмәтенә концерт күрсәттеләр. Бу бәйрәмдә балалар бакчасында тәрбияләнүче балалар да катнашты. Бәйрәм чәй өстәле артында дәвам итте.

 Көннәр җылы, аяз. Бакчада чәчү эшләре бара. Барыбызга да эш җитәрлек. Яшелчә, җиләк-җимеш муллыгын тәэмин итү өчен тырышып эшләргә дә эшләргә. Еллар тыныч, уңышлы, табыннарыбыз үз хезмәт җимешләребездән сыгылып торсын иде дигән теләктә калыйк.  

Тукай туган көнгә багышлап кичә үткәрелде, шигырьләр сөйләнде. Балалар "Шүрәле" һәм "Су анасы" әкиятен уйнадылар. "Шүрәле"не бик яраттылар, "су анасы"ның яшәү урыны балаларны кызыксындырды. Кичә күңелле үтте.

Кошлар - безнең дусларыбыз. Апрель аенда табигатькә мәрхәмәтлелек өйзеннән күп кенә эшләр планлаштырдык.  Шуларның берсе  кошлар өчен кышын куелган җимлекләрне кош ояларына алыштыруда катнаштык.

Әкият сөйләү күренеше олылар тарафыннан гадәти һәм үтә гади хәл буларак кабул ителә. Әкиятнең тәрбияви зарурлыгы бик күптәннән билгеле. Шуңа күрә дә безнең балалар бакчасында әкиятне сөйләү, тыңлау гына түгел әкият геройлары булып уйнау да оештырыла. Балаларга бу бик кызык һәм алар теләп катнашалар. Әкият ярдәмендә бала яхшылык һәм явызлык төшенчәләре белән таныша, ә гаделлекнең тантана итүе аның пакь күңелендә канәгатьлек һәм шатлык тойгылары уята.

 Нәүрүз – яңа көн, яңа ел дигәнне аңлата. Безнең борынгы бабаларыбыз Яңа елны нәкъ менә яз көне каршылаган һәм билгеләп үткән. Балалар да бу бәйрәмне  теләп үткәрделәр. Бу аларның  күмәк җырлы-биюле уеннарында чагылды. Чара шулай тәмамлана. Соңыннан балаларны һәм кунакларны яңа пешеп чыккан хуш исле коймаклар белән сыйладылар... Дөрестән дә, киләчәк буын табигатьне саклап, яклап яшәсен, борынгы әби-бабаларыбызның матур гореф-гадәтләрен онытмасын иде.

Бу дөньяда иң кыйммәтле нәрсә – кеше гомере. Тормышыбызны ямьләндереп, йортыбызга бәрәкәт өстәп дөньяга бала туа. Ап-ак биләүгә төреп,   сөенеп   туя алмый балаларны саклыйбыз, яклыйбыз.  Ә бала һәр туган көнен шатлык-сөенечләр белән көтеп ала, тизрәк үсәсе, зур буласы килә.  Әле яңа гына мин яшим дип  дөньяга аваз салган бала  бармак бекли-бекли туган көннәрен саный, бәйрәм көтә. Бу бәйрәмне балалар бакчасында билгеләп үтү әйбәт күренеш. Бүген бездә туган көн бәйрәме. Балакаем, илгә лаек шәхес булып үсегез. 

Балалар бакчасында 8нче март халыкара хатын-кызлар көне уңаеннан әниләр белән очрашу үтте. Балалар үзләре әзерләгән бүләкләрен, җыр-биюләрен бүләк иттеләр.Әниләр балалары өчен бик шатландылар, чыгышларыннан канәгать булдылар.