Балаларны юлларда хәвефсез йөрү кагыйдәләренә өйрәтү эшен кызыклы итеп оештырабыз. Менә әле генә өлкән төркем балалары белән авылыбызның машина - трактор паркына, янгын сүндерү депосына сәяхәт кылдык. Балаларга бар нәрсә дә кызык: Азат абыйлары аларга янгын сүндерү машинасының ничек эшләве турында бик тәфсилләп сөйләде, Илхам абыйлары төрле станокларда эшләп күрсәтте. Җылы гаражда трактор ремонтлаганны карап тору тагын да күңеллерәк булды. Сәяхәтебезне авылыбыз эшмәкәре  Хайрутдинов Марат абыйлары машинасында дәвам иттек. Менә без үзебезнең бакча янына кайтып туктадык. Биредә безнең мәктәп автобусы өчен эшләнгән юл борылышы. Мәктәп автобусына менеп утыруы читен булмады, билгеле, без үзебезне бик әдәпле, тыйнак пассажирлар итеп күрсәттек. Бүгенге күзәтүләрдән без бик күп нәрсә белдек, үзебезнең бакчадан чыгуга уңны - сулны, алны - артны карап йөрү кирәклегенә тагын бер инандык.