Менә көтеп алган бәйрәм иртәсе дә килеп җитте. Олысы, кечесе - бар да балалар бакчасына  бәйрәмгә ашыга. Бәйрәм быел да бик матур һәм купшы  оештырылган, Кыш бабай да бит безнең бакча  тәрәзәсеннән ничә тапкырлар инде карап узгандыр, әйтүе дә кыен.  Ул шулай ел да иң акыллы, иң булган балаларны барлап йөри һәм инде бүләкләрен дә кызганмый. Ә балалар безнең барысы да тәрбиялеләр, инсафлылар, тырышлар! Юкка гына Кыш бабай  Яңа ел чыршысына бүләк уенчыкларын элеп калдырмаган инде, белгән ул, күргән ул! Ә капчыгын күрсәң аның, исең китәр! Ниләр генә юк анда... Без барыбыз да - балалар да, өлкәннәр дә, килгән кунакларыбыз да туйганчы сыйландык Кыш бабай күчтәнәчләре белән. Билгеле инде, балалар да бик матур итеп шигырьләр сөйләделәр, җырлар җырладылар, биюләр башкардылар. Хәйләкәр Төлкебикәне Куянның өеннән куып чыгарырга да алар ярдәм иттеләр Кыш бабайга Менә шулай! Ышанмасаң, икенче елга килеп кара!