Норма урта мәктәбе базасында “Башлангыч сыйныфларда Россиянең традицион рухи кыйммәтләренә тарту чарасы буларак “Минем беренче проектларым” уку-методик комплексын тәрбия юнәлешендә куллану” темасына башлангыч сыйныф укытучылары өчен республика семинары узды. Семинар “Социаль-гуманитар белем үзәге” башлангыч белем бирү кафедрасы доценты, педагогик фәннәр кандидаты Солтанова Гүзәл Мансуровна җитәкчелегендә үтте. Семинар эшендә Арча, Биектау, Кукмара районнарыннан да укытучылар  катнашты. Районыбыз укытучылары ачык шөгыльләр, мастер-класслар күрсәтеп, чыгышлар ясап үзләренең эш тәҗрибәләре белән уртаклаштылар. Шулай ук килгән кунаклар да “Минем беренче проектларым” уку-методик комплексын куллану буенча эш алымнары турында сөйләделәр, мәктәп эшчәнлеге, мәктәптәге музей белән тирәнтен таныштылар. Семинарга түгәрәк өстәл артында йомгак ясалды. Семинар эшчәнлеге уңай яктан бәяләнде.