Көшкәтбаш башлангыч мәктәп-балалар бакчасы базасында “Башлангыч сыйныф укучыларының дәресләрдә һәм дәрестән тыш эшчәнлектә танып белү активлыгын үстерү” темасына районның башлангыч мәктәп-балалар бакчасы җитәкчеләре өчен семинар узды. Семинар балалар бакчасында балаларның сәламләве белән башланып китте. Гыйләҗетдинова Ч.М. “Серле сандык” темасына тирә-юнь белән таныштыру шөгыле күрсәтте. “Минем туган ягым” картиналар галереясы белән таныштылар. Башлангыч сыйныф укытучылары Гигиятуллина Ф.Ф. 2 сыйныфларда әйләнә-тирә дөнья фәненнән “Шәҗәрә. Нәсел агачы. Алдагы буыннар” темасына, Рахматуллина Г.Х. 3 сыйныфларда рус теленнән “Личные местоимения” темасына ачык дәресләр күрсәттеләр. Инглиз теле укытучысы Гарифуллина Л.В. тарафыннан “Телләр ятьмәсендә” темасына әзерләнгән мастер-класста да бик теләп катнаштылар. “Бабайлардан калган ядкәр” дип исемләнгән әдәби-музыкаль кичә карадылар. Җитәкчеләр башлангыч мәктәп- балалар бакчасының эшчәнлеге белән тирәнтен таныштылар. Семинар эшендә мәгариф идарәсе җитәкчесе Мөхәрләмов Ренат Камил улы да катнашты. Семинар түгәрәк өстәл артында фикер алышулар белән тәмамланды.